नेरूळ पश्चिम रेल्वे स्टेशन परिसरात कायदा आणि सुव्यवस्थेचे धिंडवडे काढणारी एक धक्कादायक घटना भरदिवसा घडली आहे. स्टेशनच्या वर्दळीच्या ठिकाणी एका माथेफिरूने थेट कर्तव्यावर असलेल्या पोलीस कर्मचाऱ्यांवरच धारदार शस्त्राने हल्ला करण्याचा प्रयत्न केला. या थरारामुळे परिसरात काही काळ प्रचंड घबराट आणि पळापळ निर्माण झाली होती.

वाईन शॉपबाहेर तळीरामांचा गोंधळ; महिला व विद्यार्थी त्रस्त

स्थानिक नागरिकांनी दिलेल्या माहितीनुसार, स्टेशन परिसरातील वाइन शॉपबाहेर दररोज तळीरामांची मोठी गर्दी जमते. भररस्त्यात, जाहीरपणे मद्यप्राशन करून हे असामाजिक तत्व येणाऱ्या-जाणाऱ्या प्रवाशांना त्रास देतात. विशेषतः महिला, विद्यार्थिनी आणि ज्येष्ठ नागरिकांना या त्रासाला सामोरे जावे लागत आहे. अनेकदा तक्रारी करूनही रेल्वे पोलीस किंवा स्थानिक पोलिसांकडून कोणतीही ठोस कारवाई होत नसल्याने या गुंडांचे धाडस आता पोलिसांवरच हात उचलण्याइतके वाढले आहे.

​नागरिकांची संतप्त मागणी:

या घटनेनंतर नेरूळकरांमध्ये तीव्र संताप आणि भीतीचे वातावरण आहे. स्टेशन परिसरात तात्काळ नियमित पोलीस गस्त (पेट्रोलिंग) वाढवावी, सार्वजनिक ठिकाणी दारू पिणाऱ्यांवर कठोर कारवाई करावी आणि पोलिसांवर हल्ला करणाऱ्या आरोपीला अद्दल घडवावी, अशी मागणी नागरिकांनी केली आहे.