NCP Nawab Malik Withdraws Bail Application: मनी लाँड्रिंग प्रकरणात अंमलबजावणी संचालनालयाच्या (ED) चौकशीला सामोरे जाणारे राष्ट्रवादी काँग्रेस पक्षाचे नेते आणि माजी मंत्री नवाब मलिक यांच्या वतीने सुप्रीम कोर्टात जामीनासाठी अर्ज दाखल करण्यात आला होता. आता नवाब मलिक यांच्याकडून हा अर्ज मागे घेण्यात आला आहे.

आता नवाब मलिक (Nawab Malik) वैद्यकीय कारणास्तव नव्याने जामीन अर्ज दाखल करणार आहेत. अलीकडेच मुंबई उच्च न्यायालयाने नवाब मलिक यांचा वैद्यकीय जामीन अर्ज फेटाळला होता. यानंतर नवाब मलिकांनी सुप्रीम कोर्टात धाव घेत जामीन अर्जासाठी याचिका दाखल केली होती. मात्र, हा जामीन अर्ज मागे घेण्यात आल्याची माहिती देण्यात आली आहे.

मुंबई उच्च न्यायालयाने जामीन अर्ज फेटाळल्यामुळे नवाब मलिक यांचा तुरुंगातील मुक्काम वाढला आहे. याआधी नवाब मलिक यांनी कनिष्ठ न्यायालयात या संदर्भातील जामिनासाठी अर्ज केला होता. पण त्यावेळीही त्यांचा नाकारण्यात आला होता.

सुप्रीम कोर्टाने (Supreme Court) नवाब मलिक यांना नवी याचिका दाखल करण्यास परवानगी दिली आहे. नवाब मलिक यांचे वकील कपिल सिब्बल यांनी न्यायालयात सांगितले की, मुंबई उच्च न्यायालयाने नवाब मलिक यांचा अंतरिम जामीन अर्ज फेटाळला आहे. उच्च न्यायालयाच्या आदेशाला आम्ही नव्याने आव्हान देऊ इच्छितो. सर्वोच्च न्यायालयाने यासाठी परवानगी दिली आहे.

प्रकृतीच्या कारणास्तव नवाब मलिक यांनी अंतरिम जामीन मागितला आहे. त्यांची एक किडनी खराब आहे. दुसरी किडनीही फार कमी काम करत आहे. प्रत्येक तपासाणीसाठी न्यायालयाकडून परवानगी मिळण्यासाठी दोन-तीन आठवडे लागतात, अशी बाजू नवाब मलिक यांच्यावतीने वकिल कपिल सिब्बल यांनी कोर्टात मांडली.

Edited by - Satish Daud