मुंबई: अखेर एक महिन्यानंतर शिंदे-फडणवीस (Eknath Shinde) मंत्रिमंडळाचा विस्तार आज झाला आहे. आज सकाळी शिंदे गटातील ९ तर भाजमधील ९ आमदारांनी शपथ घेतली. या मंत्रिमंडळात एकाही महिला आमदारांनी मंत्रीपदाची शपथ घेतलेली नाही,यावरुन आता राष्ट्रवादीच्या खासदार सुप्रिया सुळे यांनी पंतप्रधान नरेंद्र मोदी यांचे जुने ट्विट शेअर करत टीका केली आहे.

राज्याचे मुख्यमंत्री एकनाथ शिंदे (Eknath Shinde) आणि उपमुख्यमंत्री देवेंद्र फडणवीस यांच्या मंत्रिमंडळाचा शपथविधी पार पडला. उशीरा का होईना राज्याला मंत्री मिळाले ही आनंदाची बाब आहे. मंत्रीपदाची शपथ घेतलेल्या सर्वांचे हार्दिक अभिनंदन व पुढील वाटचालीसाठी शुभेच्छा, असं ट्विट खासदार सुप्रिया सुळे यांनी केले आहे, तर या ट्विट मध्ये पंतप्रधान नरेंद्र मोदी यांचे जुने ट्विट शेअर केले आहे.

'स्वतः पंतप्रधान मा. नरेंद्रीजी मोदी हे देशाच्या प्रगतीसाठी स्त्री-सक्षमीकरण आवश्यक असल्याचे सांगतात. त्यासाठी त्या केवळ 'होम मेकर' असू नयेत तर त्या 'नेशन बिल्डर' असाव्यात असं ते सांगतात. राज्याच्या स्त्री-शक्तीवर हा अन्याय आहे, असं खासदार सुप्रिया सुळे यांनी या ट्विट मध्ये म्हटले आहे.

शिंदे गटाकडून पहिल्या टप्प्यात गुलाबराव पाटील, संदिपान भूमरे, दीपक केसरकर, तानाजी सावंत, शंभुराजे देसाई, दादा भुसे, उदय सामंत, संजय राठोड, अब्दुल सत्तार हे आमदार शपथ घेणार आहेत. तर भाजपकडून पहिल्या टप्प्यात चंद्रकांत पाटील, गिरीश महाजन, सुधीर मुनगंटीवार, रवींद्र चव्हाण, राधाकृष्ण विखे पाटील, विजयकुमार गावित, सुरेश खाडे, अतुल सावे, मंगल प्रभात लोढा या आमदारांनी शपथ घेतली.