Navi Mumbai School Girl Death: नवी मुंबईच्या वाशी परिसरातून एक धक्कादायक घटना समोर आली आहे. सहावीत शिकणाऱ्या एका ११ वर्षीय विद्यार्थिनीचा शाळेच्या शौचालयात मृतदेह आढळून आला आहे. वाशी येथील सेंट मेरी या इंग्रजी माध्यम शाळेत शनिवारी (१५ जुलै) दुपारच्या सुमारास ही धक्कादायक घटना घडली. या घटनेनं परिसरात मोठी खळबळ उडाली आहे. टाईम्स ऑफ इंडियाने याबाबतचं वृत्त दिलं आहे.

मुग्धा महेंद्र कदम (वय ११) असं मृत विद्यार्थिनीचं नाव आहे. मिळालेल्या माहितीनुसार, मुग्धा कोपरखैरणे (Navi Mumbai) परिसरातील रहिवाशी असून ती वाशी येथील सेंट मेरी या इंग्रजी माध्यम शाळेत सहावीच्या वर्गात शिक्षण घेत होती.

टाईम्स ऑफ इंडियाच्या वृत्तानुसार, शनिवारी सकाळी मुग्धा नेहमीप्रमाणे शाळेत गेली. मधल्या सुट्टी दरम्यान मुग्धा शौचालयात (School Toilet) गेली होती. मात्र, वर्ग पूर्ण भरल्यावरतीही ती परत आली नाही. त्यामुळे तिच्या वर्गमित्रांनी ही बाब शिक्षकांच्या लक्षात आणून दिली.

मुग्धा बेपत्ता झाल्याचं कळताच शाळेतील शिक्षकांनी तिची शोधाशोध सुरू केली. मात्र ती शाळेच्या परिसरात कुठेच सापडली नाही. याच शाळेच्या तिसऱ्या मजल्यावर असलेला शौचालयात साफ- सफाईसाठी गेलेल्या महिलेला एक दरवाजा बंद आढळून आला.

दरवाजावर थाप मारुनही आतून काहीच प्रतिसाद दिला नाही. तेव्हा तिने तातडीने शाळेतील शिक्षकांना ही माहिती दिली. दरवाजा तोडल्यानंतर मुग्धा शौचालयात बेशुद्ध अवस्थेत आढळली. तेव्हा तातडीने शाळा प्रशासनाला याबाबत माहिती दिली.

दरम्यान, बेशुद्ध अवस्थेत असलेल्या मुग्धाला तातडीने उपचारासाठी (Hospital) रुग्णालयात दाखल करण्यात आलं. मात्र, डॉक्टरांनी तिला तपासून मृत घोषित केलं. टाईम्स ऑफ इंडियाच्या वृत्तानुसार, मुग्धाच्या शरीरावर कोणत्याही जखमा आढळून आल्या नाही.

त्यामुळे तिच्यासोबत गैरप्रकाराचा संशय नाही, असं पोलिसांनी सांगितलं. मुग्धाचे शवविच्छेदन केल्यानंतर तिला मधुमेहाचा त्रास होता, म्हणून तिचा मृत्यू झाला असावा, अशी प्राथामिक माहिती डॉक्टरांनी दिली आहे. या घटनेनं परिसरात मोठी खळबळ उडाली आहे.

Edited by - Satish Daud