नवी मुंबईतील कळंबोली परिसरात पोलिस नाकाबंदी सुरू असताना भंयकर घटना घडली. एका अनियंत्रित कारने पोलिसाला धडक देऊन थेट २०० मीटरपर्यंत फरफटत नेले. वाहनांची तपासणी सुरू असताना पोलिसांनी कार चालकाला थांबवण्याचा इशारा केला असता, चालकाने न थांबता पोलिस कॉन्स्टेबल दिलीप भोई यांना धडक दिली आणि त्यांना फरफटत नेले. या भयानक अपघातात भोई गंभीर जखमी झाले असून त्यांच्यावर उपचार सुरू आहेत. या घटनेचा सीसीटीव्ही व्हिडीओ समोर आलाय.

मिळालेल्या माहितीनुसार, कळंबोली परिसरात पोलिस नेहमीप्रमाणे नाकाबंदी करून वाहनांची तपासणी करत होते. यावेळी एका भरधाव कारला पोलिसांनी अडवले. पण चालकाने कार न थांबवता थेट समोर उभ्या असलेल्या पोलिस कॉन्स्टेबल दिलीप भोई यांना जोरदार धडक दिली. धडकेनंतर भोई हे गाडीच्या बोनेटवर फेकले गेले तरीही चालकाने कार न थांबवता त्यांना तब्बल २०० मीटरपर्यंत फरफटत नेले.

आरोपी बनावट नंबर प्लेट असलेली कार घेऊन घटनास्थळावरून पसार झाले. सध्या पोलिस सीसीटीव्ही फुटेजच्या आधारे अज्ञात आरोपींचा शोध घेत आहे. या भयानक अपघातात पोलिस कॉन्स्टेबल दिलीप भोई हे गंभीर जखमी झाले असून त्यांना तातडीने उपचारासाठी रुग्णालयात दाखल करण्यात आले आहे. नाकाबंदीला चकवा देऊन आरोपी पसार झाले आहेत.

धक्कादायक बाब म्हणजे, या कारवर असलेला नंबर देखील बनावट असल्याचे तपासात उघड झाले आहे. सध्या कळंबोली पोलिस या अज्ञात २ व्यक्तींचा आणि बनावट नंबर असलेल्या कारचा शोध घेत असून परिसरातील सीसीटीव्ही फुटेजची पाहणी सुरू आहे. या घटनेमुळे कळंबोली परिसरात खळबळ उडाली आहे. या घटनेनंतर पोलिसांच्या सुरक्षिततेचा प्रश्न ऐरणीवर आला आहे.