विकास मिरगणे, साम प्रतिनिधी

नवी मुंबईतील करावे गावाजवळ एक भीषण अपघात घडला. भरधाव वेगात असलेल्या अनियंत्रित इनोव्हा कारने रस्त्यावर उभ्या आणि चालू असलेल्या काही वाहनांना जोरदार धडक दिली. या अपघातात सुदैवाने कोणतीही जीवितहानी झाली नाही, मात्र अनेक वाहनांचे नुकसान झाले आहे. अपघात करणाऱ्या इनोव्हा कारवर ‘पोलीस’ अशी नेमप्लेट असल्याचे आढळून आल्याने परिसरात खळबळ उडाली. प्रत्यक्षदर्शींनी दिलेल्या माहितीनुसार, वाहन चालक नशेत असल्याने त्याचे वाहनावरील नियंत्रण सुटले, त्यानंतर कारनं अनेक वाहनांना उडवलं.

अपघातानंतर कारची तपासणी केली असता, त्यामध्ये मुंबई पोलिसांचे वरिष्ठ पोलीस निरीक्षक अरुण बबन पोखरकर यांचे ओळखपत्र सापडले. या प्रकारामुळे प्रकरण अधिक गंभीर बनले. घटनेची माहिती मिळताच पोलिसांनी घटनास्थळी दाखल होऊन परिस्थिती नियंत्रणात आणली असून पुढील तपास सुरू आहे.

भरधाव कारनं ३ दुचाकींना उडवलं; दोन जण जागीच ठार

कोल्हापूर शहरातील शाहू मिल चौकात भीषण अपघात झाल्याची घटना घडली. भरधाव वेगात असलेल्या क्रेटा कारने तीन दुचाकींना जोरदार धडक दिली. या अपघातात दोन जणांचा जागीच मृत्यू झाला असून एक जण गंभीर जखमी झाला. धडकेनंतर दुचाकीस्वार दूरवर फेकले गेले तर अपघातग्रस्त क्रेटा कार घटनास्थळीच उलटी झाली.

या अपघाताचा व्हिडिओ व्हायरल झाला आहे. सायबर चौकातून शाहू मिल चौकाच्या दिशेने येताना कार चालकाचा वाहनावरील ताबा सुटला. त्यामुळे हा अपघात झाल्याचा प्राथमिक अंदाज पोलिसांनी व्यक्त केला. गंभीर जखमीवर छत्रपती प्रमिलाराजे रुग्णालयात उपचार सुरू आहेत.