Mumbai News: शिवसेनेच्या नेत्या शीतल म्हात्रे आणि आमदार प्रकाश सुर्वे या दोघांचा एक मॉर्फ केलेला व्हिडिओ सोशल मीडियावर व्हायरल झाला होता. या प्रकरणी पोलिसात गुन्हा दाखल करण्यात आला आहे.

शीतल म्हात्रे यांनी या प्रकारावर संताप व्यक्त केला आहे. आज पत्रकार परिषद घेऊन त्यानी ठाकरे गटाने हा व्हिडिओ व्हायरल केला, असा आरोप केला आहे. या पत्रकार परिषदेत शिंदे गटाचे प्रवक्ते नरेश म्हस्के देखील उपस्थित होते.

यावेळी नरेश म्हस्के यांनी काही नेते मातोश्रीवर बसून इतर आमदार आणि खासदारांना व्हिडिओ पाठवून व्हायरल करण्याच्या सूचना देत होते असा गंभीर आरोप केला आहे. तसतेच राजकीय लढाई ही तत्वांची असते विचारांची असते. त्यात असे प्रकार घडणे गंभीर असल्याचे त्यांनी म्हटले आहे. (Latest Marathi News)

जी स्त्री आपल्या विचारांनी आणि तत्त्वांनी राजकीय विरोध करत असते तिला उत्तर देता येत नाही म्हणून अशा प्रकारे तिची निंदानालस्ती करणे योग्य नाही. याचा प्रत्येक स्त्रीने निषेध केला पाहिजे. उद्धव बाळासाहेब गटाच्या अधिकृत पेजवरून हा व्हिडिओ व्हायरल झाला. काही नेते मातोश्रीवर बसून इतर आमदार, खासदार आणि नेत्यांना हा व्हिडिओ व्हायरल करण्यास सांगत होते हे मी खात्रीलायकपणे सांगतो असे नरेश म्हस्के म्हणाले आहेत. (Maharahshtra Politics)