अंधश्रद्धा निर्मुलन समितीचे अध्यक्ष डॉ. नरेंद्र दाभोलकर यांच्या हत्या प्रकरणाचा निकाल आज (ता. १०) पुणे सत्र न्यायालयाने जाहीर केला. तब्बल ११ वर्षांनी डॉ. दाभोलकर यांच्या हत्या प्रकरणात निकाल लागला. या प्रकरणात एकूण ५ आरोप होते. त्यापैकी सचिन अंदूरे, शरद कळसकर यांना न्यायालयाने दोषी ठरवत जन्मठेपेची शिक्षा सुनावली.

याशिवाय न्यायालयाने आरोपींना ५ लाखांचा दंडही ठोठावला. इतर तीन आरोपी वीरेंद्र तावडे, संजीव पुनाळेकर आणि विक्रम भावे, यांची कोर्टाने निर्दोष सुटका केली. डॉ. दाभोळकर हत्या प्रकरणात कटकारस्थान रचल्याचा वीरेंद्र तावडे आरोप होता.

तर आरोपी संजीव पुनाळेकर याने मारेकऱ्यांना शस्त्र नष्ट करण्याचा सल्ला दिला होता. याशिवाय विक्रम भावे हा देखील कटात सहभागी होता. दरम्यान, तावडे याचा या गुन्ह्यात हेतू दिसून आलेला आहे. तसेच त्यावर संशय घेण्यासारखी परिस्थिती आहे.

मात्र त्यांच्या विरोधात गुन्हा सिद्ध करण्यात पोलीस आणि सरकार पक्ष अपयशी ठरले आहेत, असं कोर्टाने म्हटलं. तर भावे आणि पुनावळेकर यांच्या विरोधात देखील सक्षम पुरावे सादर करण्यात पोलिसांना यश आलेले नाही. त्यामुळे या तिन्ही आरोपींची निर्दोष मुक्तता करण्यात येत आहे, असं कोर्टाने स्पष्ट केलं.

आरोपी सचिन अंदुरे आणि शरद कळसकर यांनी गोळीबार केल्याची कबुली दिली आहे. त्यांच्या विरोधातील सक्षम पुरावे पोलिसांनी न्यायालयात सादर केले आहे. त्या आधारे दोघांना जन्मठेपीची शिक्षा आणि प्रत्येकी ५ लाख दंड ठोठावण्यात येत आहे, असं कोर्टाने निकाल देताना म्हटलं.

डॉ. नरेंद्र दाभोलकर यांची २० ऑगस्ट २०१३ रोजी पुण्यातील ओंकारेश्वर मंदिराजवळील महर्षी शिंदे पुलावर गोळ्या झाडून हत्या करण्यात आली होती. सकाळी सव्वा सातच्या सुमारास दुचाकीवरून आलेल्या दोघांनी त्यांना थांबवले आणि अगदी जवळून पिस्तुलाच्या गोळ्या त्यांच्यावर झाडल्या होत्या. यात दाभोलकर यांचा जागीच मृत्यू झाला होता.