पुणे: पुण्यातला क्रुरकर्मा सावकार नानासाहेब गायकवाड आणि त्याचा मुलगा गणेश गायकवाड यांना अटक केल्यानंतर त्यांना वेगवगळ्या गुन्ह्यांमध्ये वापरलेल्या आलिशान मोटार कार पोलिसांनी जप्त करायला सुरुवात केली आहे. आतापर्यंत जप्त केलेल्या आलिशान गाड्यांमध्ये रोल्स रॉयल, मर्सडिझ, रेंज रोवर, पजेरो अशा विविध कोट्यवधी किमतीच्या गाड्या जप्त करण्यात आल्या आहेत.

पोलिसांनी कारवाईचा फास आवळताच गायकवाडने लोकांकडून लुबडलेला अफाट खजिना समोर येऊ लागला आहे. लोकांच्या जमिनी ताब्यात घेऊन बळजबरीने स्वत:च्या व कुटुंबातील व्यक्तीच्या नावाने करून घेणं हा गायकवाडचा मुख्य व्यवसाय असल्याचे आता पुढे येत आहे.

दरम्यान, नानासाहेब गायकवाड आणि गणेश गायकवाड यांना अखेर दीड महिना शोध घेतल्यानंतर पुणे पोलिसांनी वेगवेगळ्या गुन्ह्यांमध्ये अटक केली होती. गणेश गायकवाड याने त्याची पत्नी आणि राष्ट्रवादीचे सोलापूरचे नेते दीपक आबा साळुंखे यांच्या मुलीचा सिगारेटचे चटके देऊन मारहाण करून कौटुंबिक छळ केल्याप्रकरणी पहिला गुन्हा चतुर्श्रुंगी पोलिस ठाण्यात दाखल झाला होता. यानंतर गणेश गायकवाड नानासाहेब गायकवाड यांच्यावर पुणे आणि पिंपरी-चिंचवड पोलीस ठाण्याच्या हद्दीत वेगवेगळ्या पोलिस ठाण्यांमध्ये खंडणी, बलात्कार जीवे मारण्याची धमकी असे अनेक गंभीर गुन्हे दाखल झाले होते.

त्यानंतर पुणे आणि पिंपरी-चिंचवड पोलिसांनी बाप लेकांसह आणखी दोघांवर मोकाची कारवाई केलेली होती. तेव्हापासून गेले दीड महिना गणेश गायकवाड आणि नानासाहेब गायकवाड हे दोघेही फरारी होते. त्यांच्या मागावर पुणे पोलिसांची अनेक पथके काम करत होती अखेरीस त्यांना कर्नाटक मधून अटक केल्याची माहिती समोर आली होती. नानासाहेब गायकवाड हे चिंचवड चे भाजप आमदार लक्ष्मण जगताप यांचे सख्खे मावस भाऊ आहेत.

Edited By: Pravin Dhamale