सुनील काळे, साम टीव्ही, प्रतिनिधी

राज्याच्या राजकारणातील सर्वात मोठी बातमी समोर आली आहे. गेल्या अनेक दिवसांपासून चर्चा असलेल्या महाविकास आघाडीचा जागावाटपाचा तिढा अखेर सुटला आहे. सूत्रांनी दिलेल्या माहितीनुसार, महाविकास आघाडीच्या जागावाटपाची आजची बैठक संपली आहे. या बैठकीत सकारात्मक चर्चा झाली असून सर्व जागांचा तिढा जवळपास सुटला आहे.

कधी होणार जागावाटप जाहीर?

याबाबत माहिती देताना सूत्रांनी सांगितलं की, येत्या 11 तारखेला महाविकास आघाडीची पत्रकार परिषद पार पडणार आहे. या पत्रकार परिषदेला शरद पवार, उद्धव ठाकरे आणि नाना पटोले संबोधित करणार आहेत. याचवेळी महाविकास आघाडीचे जागावाटप जाहीर होऊ शकतं.

सुनील काळे, साम टीव्ही, प्रतिनिधी

सूत्रांनी याबाबत अधिक माहिती देताना सांगितलं की, महाविकास आघाडीची नवरात्री सुरु झाल्यानंतर ही पहिलीच बैठक झाली. यानंतर आता मविआतील तिन्ही पक्षाचा प्रमुखांची पत्रकार परिषद 11 तारखेला होणार आहे. या पत्रकार परिषदेत हे तिन्ही नेते जागावाटप जाहीर करू शकतात. तसेच महायुती सरकारच्या कारभारावर टीका देखील करू शकतात.

सूत्रांनी सांगितलं की, आगामी विधानसभा निवडणुकीच्या पार्श्वभूमीवर महाविकास आघाडीचं जागावाटप अंतिम टप्प्यात आलं आहे. याचबाबतची घोषणा 11 तारखेला होऊ शकते.

याचबद्दल माहिती देताना शरद पवार गटाचे नेते आणि माजी गृहमंत्री अनिल देशमुख म्हणाले आहेत की, ''जागावाटपाच्या चर्चेचा आज दुसऱ्या टप्प्यातील दुसरा दिवस होता. उद्या अंतिम दिवस आहे. बहुतेक जागेवर निर्णय झाले आहेत. उद्या विदर्भाच्या काही जांगणावर चर्चा होणार आहे. विदर्भापासून उद्या सुरुवात होईल. 10-15 जागांवर चर्चा सुरू आहे. जे जिंकून येणार त्या पक्षाला जागा देणार आहे.''