मुंबईच्या विले पार्ले भागातील साठ्ये कॉलेजमधून हादरवणारी घटना उघडकीस आली आहे. शेवटच्या वर्षात शिकणाऱ्या विद्यार्थिनीनं टोकाचं पाऊल उचललं. तिनं इमारतीच्या तिसऱ्या मजल्यावरून आत्महत्या केली आहे. या प्रकरणानंतर पोलीस घटनास्थळी दाखल झाले असून, पोलिसांकडून तपास सुरू आहे. मात्र,तिच्या पालकांनी मृत्यूबाबत वेगळाच संशय व्यक्त केला आहे. तरूणीला कुणीतरी धक्का मारल्याचा संशय व्यक्त केला आहे. साठ्ये कॉलेजनं मात्र, ही आत्महत्या असल्याचं स्पष्ट केलं आहे.

संध्या पाठक (वय वर्ष २१) असे मृत तरूणीचे नाव आहे. विले पार्ले स्थित साठ्ये कॉलेजमध्ये थर्ड इअरची ती विद्यार्थिनी होती. तिने इमारतीच्या तिसऱ्या मजल्यावरून उडी घेत आयुष्य संपवलं. विद्यार्थिनीचा मृतदेह आढळल्यानंतर कॉलेज प्रशासनाने यासंदर्भातील माहिती कुटुंबाला दिली. कुटुंब तातडीने कॉलेजमध्ये दाखल झाले. त्यांनी या घटनेनंतर एक वेगळाच संशय व्यक्त केला आहे.

'आमची मुलगी आत्महत्या करू शकत नाही', असं म्हणत मृत तरूणीच्या कुटुंबाने संशय व्यक्त केला आहे. तरूणीला नेमकं कुणी ढकललं? यांसारखे प्रश्न मृत तरूणीच्या कुटुंबाने व्यक्त केला आहे. घटनेची माहिती मिळताच पोलिसांनी साठ्ये महाविद्यालयात धाव घेतली, तसेच सीसीटीव्ही फुटेज तपासले. सीसीटीव्ही फुटेजमध्ये तिसऱ्या मजल्यावर तरूणी कॉरिडरमध्ये चालत असताना दिसून येत आहे.

तरूणीनं आत्महत्या केल्यानंतर तिला तातडीने जवळच्या रूग्णालयात नेण्यात आलं. मात्र, डॉक्टरांनी तिला मृत घोषित केलं. सध्या संध्याने टोकाचं पाऊल का उचललं? तिने आत्महत्या केली की घातपात? यांसारख्या अनेक प्रश्नांची उत्तरे पोलीस शोधत आहेत. दरम्यान, पोलीस तापासातून काय समोर येतंय हे पाहणं महत्त्वाचं ठरणार आहे.