Mumbai Rain Alert Today News राज्यात गेल्या काही दिवसांपासून तापमानाचा पारा ४० शी पार होता. त्यामुळे नागरिक उकाड्याने हैराण झाले होते. अशातच रविवारची सकाळ नागरिकांना दिलासा देणारी ठरली आहे. रविवारी मध्यरात्रीपासून मुंबईसह अनेक शहरात पावसाने हजेरी लावली आहे. परिणामी मान्सूनपूर्व पावसाने मुंबईची लोकल विस्कळीत झाली. दरम्यान आज मुंबई शहरासह पालघरला यलो अलर्ट देण्यात आला आहे.

दरम्यान, भारतीय हवामान विभागाने (IMD) मुंबई आणि पालघर जिल्ह्यासाठी पुढील तीन तासांसाठी ‘यलो अलर्ट’ जारी केला आहे. या काळात काही ठिकाणी विजांच्या कडकडाटासह मेघगर्जना होण्याची शक्यता असून हलका ते मध्यम स्वरूपाचा पाऊस पडू शकतो. तसेच ताशी ३० ते ४० किलोमीटर वेगाने वारे वाहण्याची शक्यता वर्तवण्यात आली आहे. त्यामुळे नागरिकांनी आवश्यक ती खबरदारी घ्यावी, असे आवाहन हवामान विभागाने केले आहे.

हवामान खात्याच्या अंदाजानुसार, मुंबईत रविवारपासून पुढील तीन दिवस हलका ते मध्यम स्वरूपाचा पाऊस सुरू राहण्याची शक्यता आहे. पालघर आणि ठाणे (Palgahar Thane Rain Alert) जिल्ह्यांसाठीही सोमवारी मेघगर्जनेसह पावसाचा यलो अलर्ट जारी करण्यात आला आहे. तसेच रायगड, रत्नागिरी आणि सिंधुदुर्ग (Kokan Rain Alert ) जिल्ह्यांमध्ये सोमवार आणि मंगळवारी पावसाची तीव्रता वाढण्याची शक्यता व्यक्त करण्यात आली आहे.

रविवारी सकाळी अनेक नागरिक फिरण्यासाठी बाहेर पडले असताना अचानक झालेल्या पावसामुळे त्यांची धावपळ उडाली. मात्र मान्सूनपूर्व पावसाने मुंबईची उपनगरीय रेल्वे २५ मिनिटे उशिराने धावत आहे. (Local Train Delayed Today ) मध्य, हार्बर आणि पश्चिम रेल्वे मार्गावरील लोकल गाड्या उशिरा असल्याने असल्याने प्रवाशांची गैरसोय झाली आहे. तथापि, पावसाचा जोर वाढल्यास वाहतूक व्यवस्थेवर परिणाम होण्याची शक्यता नाकारता येत नाही.