नजर हटी दुर्घटना घटी अशा प्रकारचे चालकांना संदेश देणारे फलक रस्त्याच्या तीव्र वळणात लावलेले आपल्याला पाहायला मिळतात. मात्र अशीच एक घटना मुंबई- पुणे एक्सप्रेसवेवर घडली आहे. चालकाच्या डुलकीने भयावह अपघात घडवून आणला आहे. या अपघातात एकूण पाच जण जखमी झाले आहेत. त्यापैकी एकाची प्रकृती चिंताजनक आहे.

मिळालेल्या माहितीनुसार, पुण्याहून मुंबई कडे जात असताना मुंबई- पुणे एक्सप्रेसवेवर चार चाकी गाडीच्या वाहनचालकाला झोप लागल्याने त्याचे गाडीवरील नियंत्रण सुटलं. यादरम्यान गाडी टोल नाक्यावरील डिव्हाडर येऊन आदळली. या घटनेत पाच जण जखमी झाले आहेत.या घटनेची माहिती पोलिसांना कळवण्यात आली. मिळालेल्या माहितीच्या आधारे पोलीस घटनास्थळी दाखल झाले.

पोलिसांनी स्थानिक नागरिकांच्या मदतीने जखमींना कामोठे येथील एमजीएम हॉस्पीटल मध्ये उपचारासाठी पाठवण्यात आलं आहे. हा अपघात इतका भीषण होता की गाडीच्या पुढील भागाचा चक्काचूर झाला. शिवाय या अपघातात कोणतीही जीवित हानी झालेली नसून आर्थिक हानी मोठ्या प्रमाणावर झाली आहे. या घटनेने परिसरात खळबळ उडाली आहे.

पोलीस या घटनेचा सविस्तर तपास करत आहेत. या घटनेनंतर एक्स्प्रेसवेवर लांबचा प्रवास करणाऱ्या चालकांनी पुरेशी विश्रांती घेणे किती महत्त्वाचे आहे, हे या घटनेतून पुन्हा एकदा स्पष्ट झाले आहे. दरम्यान संबंधित चालकाला शिक्षा होणार का हे पाहणं महत्त्वाचं ठरेल.