सुप्रीम मस्कर, साम टीव्ही

Mumbai Rain Update : यंदा महाराष्ट्रात मान्सून आठवड्यापूर्वीच दाखल झाला. आणि प्रशासकीय व्यवस्थेच्या कारभाराची पोलखोल झाली. मान्सूनच्या आगमनानं सुखावलेला मुंबईकर आठवड्याच्या पहिल्याच दिवशी ऑफीसला जायला निघाला खरा मात्र अपेक्षेप्रमाणेच ऱेल्वे इंडीकेटर शून्य दाखवत होता. रेल्वे रुळही पाण्याखाली गेले होते. पश्चिम, हार्बर आणि मध्य रेल्वसेवा म्हणजे मुंबईकरांची जीवनवाहिनी. पण मे महिन्यातल्या या पावसानं ती पहिल्याच फटक्यात कोलमडली.

लोकल रखडली म्हणून काहींनी रस्तेवाहतुकीचा मार्ग निवडला.मात्र तिथेही तीच तऱ्हा..जोरदार पावसानं उपनगरापांसून दक्षिण मुंबईपर्यंत वाहनांच्या रांगा लागल्या होत्या. पाण्याने भरलेल्या रस्त्यातून, गटाराच्या पाण्यातून वाट काढत कर्मचाऱ्यांनी मंत्रालय परिसर गाठला खरा मात्र तिथंही आपापल्या ऑफिसपर्यंत पोहचण्यासाठी कर्मचाऱ्यांना गुडघ्याभर पाण्यातून वाट काढत चालत जावं लागलं. दुसरीकडे केईएम रुग्णालयातल्या कॅरीडोअरपर्यंतही पावसाचं पाणी पोचलं.

दरम्यान काही चाकरमन्यांनी मेट्रोनं प्रवास करण्याचा निर्णय घेतला पण तिथे तर पायऱ्यांवरच पाण्याचे लोट वाहत होते..मेट्रो स्टेशनची पहिल्याच फटक्यात दुर्दशा झाली.

मुंबईची तुंबई होऊ देणार नाही, असं पावसाआधी आश्वासन नेतेमंडळी, प्रशासकीय अधिकारी, देत असतात. मात्र यावेळी आठवडाभर आधी दाखल झालेल्या पावसांनं सगळीच आश्वासन पाण्यात वाहून गेली. खर तर देशाच्या आर्थिक राजधानीत राहत असलेल्या मुंबईकरांना दरवर्षी पावसाळ्यात याच परिस्थितीचा सामना करावा लागतो.मात्र .एवढे धक्के खाऊनही मुंबईकर जागा होत नाही... ये रे माझ्या मागल्या म्हणत दरवर्षी ही जीवघेणी कसरत सहन करणाऱ्या मुंबईकरांच्या सहनशीलतेला सलामच करायला हवा...