CM Eknath Shinde: मुख्यमंत्री एकनाथ शिंदे (CM Eknath Shinde) यांच्या ताफ्याला फॉलो करणाऱ्या एकाला पोलिसांनी अटक केली आहे. वांद्रे पोलिसांनी (Bandra Police) ही कारवाई केली आहे. वांद्रे-वरळी सी लिंकजवळ (Bandra-Worli Sea Link) ही घटना घडली होती. पोलिसांनी मुख्यमंत्र्यांच्या ताफ्याला फॉलो करणाऱ्याविरोधात तात्काळ कारवाई केली.

मिळालेल्या माहितीनुसार, गुरूवारी २७ जुलै रोजी वांद्रे-वरळी सी लिंकजवळ मुख्यमंत्र्यांचा ताफा पुढे गेल्यावर रस्ता मोकळा असल्याचे बघून ताफ्या पाठोपाठ एका व्यक्तीने आपली कार नेली होते. या व्यक्तीला मुख्यमंत्र्यांच्या ताफ्याला फॉलो केल्याप्रकरणी अटक करण्यात आली आहे. वांद्रे पोलिसांनी या व्यक्तीविरोधात गुन्हा दाखल करत त्याला अटक केली आहे.

भादंवि २७९ (बेदरकार पणे वाहन चालवणे) आणि ३३६ (दुसऱ्यांचा जीव किंवा वैयक्तिक सुरक्षा धोक्यात आणणे) तसंच मोटर वाहन कायद्यांतर्गत या व्यक्तीविरोधात गुन्हा दाखल करण्यात आला आहे. गंगू रझक असं या अटक करण्यात आलेल्या कार चालकाचे नाव आहे.

पोलिसांनी अटक केलेल्या गंगू रझक या कार चालकाची चौकशी केली असता त्याने मुख्यमंत्र्यांच्या ताफ्याला फॉलो करण्यामागे काहीच हेतू नव्हता. आपण कामानिमित्त जात होतो आणि कार मुख्यमंत्र्यांच्या ताफ्यामागे ठेवली असे सांगितले आहे. या कारचालकाला कोर्टात हजर केले असता त्याला जामीन देण्यात आला असल्याची माहिती वांद्रे पोलिसांनीच दिली आहे.