Land Scam Case News: ठाकरे गटाच्या नेत्यांच्या अडचणीत वाढ होताना दिसत आहे. ठाकरे गटाचे माजी मंत्री रवींद्र वायकर यांची आर्थिक गुन्हे शाखेकडून पाच तास चौकशी करण्यात आली आहे. 500 कोटींच्या भूखंड घोटाळ्या प्रकरणी ही कारवाई सुरु आहे.

रवींद्र वायकर यांनी मुंबई महापालिकेची दोन लाख वर्ग फूट जमिनीवर अनधिकृत कब्जा केला असून तिथे 500 कोटींचं पंचतारांकित हॉटेल उभारलं जात असल्याचा आरोप सोमय्या यांनी केला होता.

रवींद्र वायकर यांनी मातोश्री स्पोर्टस ट्रस्टचा आणि सुप्रीमो बँक्वेटच्या नावाने शेकडो कोटींचा घोटाळा केला असल्याचा आरोप आहे. मुंबई महापालिकेच्या अखत्यारीत असलेले खुले क्रीडांगण व गार्डनसाठी असलेल्या जागेवर रवींद्र वायकर यांनी अनधिकृत कब्जा केला, असाही त्यांच्यावर आरोप सोमय्या यांनी केला होता. याच प्रकरणी त्यांची चौकशी सुरु आहे. (Latest Marathi News)

गुन्हे शाखेकडून चौकशी झाल्यानंतर माध्यमांशी बोलताना रवींद्र वायकर म्हणाले आहेत की, ''500 कोटींचा घोटाळ्याचा आरोप करत तक्रार केली होती. मला आधीच बोलावलं होतं, पण मी वेळ वाढवून मागितला होता. एक मनुष्य खोटा आणि विकृत आहे.''

'मी कोणतीही चोरी, गैरप्रकार केलेला नाही'

वायकर पुढे म्हणाले, ''मी कोणतीही चोरी, गैरप्रकार केलेला नाही. कोणत्याही चौकशीला सामोरे जाण्यास मी तयार आहे. किरीट सोमय्या सारखा माणूस हा आमच्या तक्रारी करत आहे. किरीट याला खरं तर तोंड दाखवायला जागा नाही. तरी तो आमच्या तक्रारी करत आहे. पण आम्ही कोणाला घाबरत नाही. मी बाळासाहेब ठाकरे यांचा कट्टर शिवसैनिक आहे.''