मुंबईकरांसाठी खूशखबर. मिठी नदीवरील जुना पूल पाडण्यात येणार आहे. धारावी येथील ड्राइव्ह इन थिएटरजवळ नवीन पूल उभारला जाणार आहे. या पुलाच्या कामासाठी मुंबई महापालिकेनं कंत्राटदाराची निवड केली असून, या पुलाच्या कामासाठी साधारण ३०३ कोटी रूपये खर्च अपेक्षित असल्याची माहिती आहे. महापालिकेनं दिलेल्या माहितीनुसार, या नवीन पूलामुळे वाहतूक कोंडी दूर होईल.

मिठीनदीवरील पुलासाठी मुंबई महापालिकेनं विस्तृत आराखडा तयार केला आहे. जुलै २००५ साली आलेल्या अतिवृष्टीनंतर तथ्य शोधन समितीची स्थापना डॉ. चितळे यांच्या अध्यक्षतेखाली करण्यात आली होती. या समितीनं त्यावेळी मिठी नदीचं पात्र ६८ मीटरवरून १०० मीटरपर्यंत वाढवण्याची शिफारस केली होती.

या शिफारशीनुसार, शीव- धारावी आणि पश्चिम उपनगरातील वांद्रे यांना जोडणाऱ्या पुलाची पुनर्बांधणी केली जाणार आहे. तसेच रूंदी वाढवण्यात येणार आहे. ही कामे दोन टप्प्यात पार पडणार आहे. वांद्रे पूर्व येथील ड्राइव्ह इन थिएटरजवळून मिठी नदी वाहते. या नदीवरील पुलावरून वाहतूक होती. मात्र, वाहनांची प्रचंड गर्दी होते. यामुळे पुलाची रूंदी आणि उंची वाढवण्याचा निर्णय महापालिकेनं घेतला आहे.

सध्या जुन्या पुलाची रूंदी ९.३ मीटर आहे. तर, लांबी १०८ आहे. नवीन पुलाच्या कामानंतर रूंदी ४८ मीटर होईल. यापुलामुळे बीकेसी, शीव अशा ठिकाणी जाणाऱ्या वाहनांचा प्रवास अधिक सुरळीत आणि सोपा होईल. नव्या पुलाच्या कामासाठी कंत्राटदार निवडण्यात आला आहे. पुलाच्या पुनर्बांधणी करण्यासाठी ३०३ कोटी ९५ लाख रूपये खर्च अपेक्षित आहे. हा नवीन पूल २ वर्षांत उभारण्याचे उद्दीष्ट आहे.