मयूर राणे, साम टीव्ही

मुंबईच्या लोकल ट्रेनमध्ये पुन्हा एकदा हाणामारीची घटना घडली आहे. लोकलच्या जनरल डब्यात प्रवाशांमधील भांडणाचं रुपांतर हाणामारीमध्ये झालं. प्रवाशांनी एकमेकांना शिवीगाळ करून हाणामारी केली. काही दिवसांपूर्वीच विरार लोकलमध्ये महिला प्रवाशांची हाणामारीची घटना घडली होती. त्यानंतर आता मध्य रेल्वेच्या धावत्या लोकलमध्ये प्रवाशांची हाणामारीची घटना घडली आहे. प्रवाशांच्या हाणामारीचा हा व्हिडिओ सोशल मीडियावर व्हायरल झाला आहे.

मुंबईत लोकल ट्रेनमधील प्रवाशांची गर्दी दिवसेंदिवस वाढू लागली आहे. प्रवाशांना अक्षरश: फूटबोर्डावर उभं राहून प्रवास करावा लागतो. लोकल डब्ब्यातील प्रवाशांच्या या गर्दीमुळे प्रचंड रेटारेटी होत असते. लोकल ट्रेनमध्ये काही प्रवासी धक्का देऊन सीटवर बसण्याचा प्रयत्न करतात. यामुळे अनेक वाद होतात. अनेकदा छोट्या भांडणाचं रुपांतर हाणामारीत होतं. लोकल ट्रेनमधून प्रवाशांना अक्षरश: जनावरांसारखा प्रवास करावा लागतो. गर्दीमुळे अनेक प्रवाशांचे नाहक बळी गेले आहेत. या गर्दीमुळे गेल्या काही महिन्यांपासून प्रवाशांचा संयम सुटत असल्याचे दिसत आहे. लोकलमध्ये प्रवाशांच्या हाणामारींच्या घटनांमध्ये वाढ झाल्याचं पाहायला मिळत आहे.

सीएसएमटी-कर्जत लोकलमध्ये राडा

सीएसएमटी-कर्जत लोकल ट्रेनमध्ये आज रविवारी राडा झाला. मध्य रेल्वेवरील घाटकोपर आणि मुलुंडदरम्यान धावत्या लोकलमध्ये प्रवाशांची तुंबळ हाणामारी झाली. या हाणामारीमुळे प्रवाशांमध्ये भीतीचं वातावरण निर्माण झालं. दोन्ही प्रवाशांच्या हाणामारीनंतर इतरांनी त्यांना धक्का मारत चोप दिला. हाणामारी करणाऱ्यांना संतप्त प्रवाशांनी सिग्नलवर ट्रेन थांबताच डब्यातून उतरवलं. या हाणामारीमुळे मुंबई लोकलमधील गर्दीमुळे प्रवाशांचा संयम सुटत असल्याचं दिसून येत आहे.

लोकल ट्रेनमध्ये महिलांची डोके फुटेपर्यंत हाणामारी

काही दिवसांपूर्वी धावत्या चर्चगेट-विरार लोकलमध्ये महिला प्रवाशांचा राडा झाला होता. लोकल ट्रेनमध्ये दोन महिलांची हाणामारी झाली होती. दोन्ही प्रवाशांनी रक्तबंबाळ होईपर्यंत हाणामारी केली. या हाणामारीच्या घटनेत एका महिलेचं डोकं फुटलं. ही घटना १७ जून रोजी सायंकाळी घडली. दोन्ही महिला जागेच्या वादावरुन एकमेकींना भिडल्या. लोकल भाईंदरमध्ये पोहोचल्यानंतर रेल्वे पोलिसांनी वादात हस्तक्षेप केला. पोलिसांनी दोन्ही महिलांना लोकलमधून खाली उतरवलं.

टीप: मुंबई लोकलमधील हा व्हिडीओ सध्या सोशल मीडियावर व्हायरल होतोय. याची पडताळणी झालेली नसून आम्ही फक्त माहिती म्हणून आम्ही वाचक-प्रेक्षकांपर्यंत ही बाब पोहोचवतोय. आम्ही याचं कोणत्याही प्रकारे समर्थन करत नाही.