Lalbaug mahaGanpati accident मुंबईत गणपती बाप्पाच्या दर्शनासाठी हजारो भाविकांची गर्दी उसळली असतानाच, रविवारी पहाटे एका दुर्दैवी दुर्घटनेने लालबाग परिसर हादरला. काळाचौकी येथील महागणपतीच्या मंडपाजवळ अचानक करंट लागल्याने २ जणांचा मृत्यू झाला. तर ३ जण गंभीर जखमी आहेत. या घटनेत ८ वर्षांच्या चिमुकलीसह एका महिलेचा मृत्यू झाला. घटनेनंतर परिसरात एकच घबराट पसरली असून पोलीस आणि पालिका प्रशासन सध्या या प्रकरणाचा अधिक तपास करत आहे.

घटना काय घडली?

रविवार (२० सप्टेंबर २०२६) च्या पहाटे साधारण २:२० ते ३:०० वाजेच्या सुमारास मुंबईतील लालबाग परिसरात (काळाचौकी येथील दत्ताराम लाड मार्ग) महागणपती मंडळाच्या मंडपाजवळ ५ जणांना विजेचा शॉक लागल्याची दुर्घटना घडली. गणेशोत्सवामुळे या परिसरात भक्तांची प्रचंड गर्दी होती. त्याच वेळी मंडपाच्या जवळ अचानक वीजेचा करंट पसरल्यामुळे भीषण अपघात घडला. यामध्ये २ जणांचा मृत्यू झाला आहे. तर ३ जणांवर आयसीयूमध्ये उपचार सुरू आहेत.

२ जणांचा मृत्यू

या दुर्घटनेत दुर्दैवाने २ जणांचा मृत्यू झाला आहे. रागिणी घनश्याम यादव (वय वर्ष ८) या लहान मुलीचा उपचारादरम्यान मृत्यू झाला. एका महिलेचाही रुग्णालयात उपचार सुरू असताना मृत्यू झाला आहे. तिची ओळख पटवण्याचे काम सुरू आहे. विजेचा धक्का लागल्यामुळे काही लोक जखमी झाले आहेत. ३ जणांवर आयसीयूमध्ये उपचार सुरू आहेत. जखमींमध्ये किरण अकबर नाईक (१९ वर्ष), तन्वी नरेश हांडे (१९ वर्ष), साहिल संदीप तारे (१९ वर्ष) आणि रुही सिंग (१२ वर्ष) यांचा समावेश आहे.

मदत व बचावकार्य

दुर्घटनेची माहिती मिळताच अग्निशामक दल, पोलीस, बेस्ट (BEST) चे कर्मचारी आणि पालिकेच्या वॉर्ड ऑफिसचे अधिकारी तातडीने घटनास्थळी पोहोचले. जखमींना तात्काळ भायखळा येथील मसिना रुग्णालय आणि परेल येथील ग्लोबल रुग्णालयात दाखल करण्यात आले. जखमींवर सध्या उपचार सुरू आहेत. पोलीस या प्रकरणाचा अधिक तपास करत आहेत.

दर्शनसाठी १० किमीची रांग

लालबागच्या राजाच्या मुख दर्शनाची रांग तब्बल १० किलोमीटरपेक्षा जास्त लांब गेली आहे. रविवार सुट्टीचा दिवस असल्यामुळे गणेशभक्तांनी लालबागचा राजाच्या दर्शनाला मोठी गर्दी केली आहे. लालबाग मार्केट ते भायखळा रेल्वे स्टेशनपर्यंत ही दर्शन रांग पोहचली आहे. रविवारी लालबागच्या राजाच्या दर्शनासाठी गणेशभक्तांची सर्वाधिक गर्दी होणार आहे.