सचिन गाड, साम टीव्ही प्रतिनिधी

मुंबई : मुंबईतील सहा मतदारसंघातील मतदान २० मे रोजी पार पडलं. या मतदानाच्या पार्श्वभूमीवर पोलीस प्रशासनाकडून मोठा बंदोबस्त तैनात करण्यात आला होता. यावेळी राज्यभरातील अनेक होमगार्ड कर्मचाऱ्यांनाही तैनात करण्यात आलं होतं. मतदान प्रक्रिया झाल्यानंतर होमगार्ड घरी निघाले आहेत. मुंबईत बंदोबस्तासाठी आलेले काही होमगार्ड घरी परतण्याची सोय न झाल्याने अस्वस्थ होते. यापैकी काही होमगार्डची पोलिसांसोबत बाचाबाची झाली. या बाचाबाचीचा व्हिडिओ व्हायरल होत आहे.

मुंबईत मतदानाच्या ड्युटीसाठी आलेले होमगार्ड घरी निघाले आहेत. मात्र, या होमगार्डना घरी जाण्यासाठी त्यांची सोय नव्हती. मतदानासाठी मुंबईत आलेल्या होमगार्ड आणि पोलिसांमध्ये बाचाबाची झाली. यावेळी होमगार्ड कर्मचाऱ्यांनी पोलिसांनी शिवीगाळ केल्याचा आरोप केला.

पोलिसांच्या शिवीगाळ केल्याचा आरोप केल्यानंतर होमगार्ड कर्मचाऱ्यांनी आक्रमक भूमिका घेतली. मतदानाच्या दिवशी बंदोबस्ताकरिता सर्व होमगार्ड मुंबईत आले होते.

मतदानानंतर वेळीच घरी परतण्याची सोय न झाल्याने होमगार्ड अस्वस्थ झाले. मुंबईतील निर्मल नगर पोलीस ठाण्याच्या हद्दीत हा प्रकार घडल्याची माहिती मिळत आहे.

व्हिडिओमध्ये काय दिसत आहे?

या व्हायरल व्हिडिओमध्ये पोलीस अधिकारी आणि होमगार्ड दिसत आहेत. दोघांमध्ये भांडण सुरु असल्याचे दिसत आहे. व्हिडिओमध्ये पोलीस होमगार्ड कर्मचाऱ्यांवर भडकलेले दिसत आहेत. तसेच पोलीस अधिकाऱ्यांकडून होमगार्ड कर्मचाऱ्यांना बोलणं ऐकण्यास सांगत आहेत. तर दुसरीकडे होमगार्ड शिवीगाळ केल्याचा आरोप करत आक्रमक झालेले पाहायला मिळाले. त्यामुळे रस्त्यावर एकच गोंधळ पाहायला मिळाला. या बाचाबाचीचा व्हिडिओ सोशल मीडियावर व्हायरल होत आहे.