येत्या दिवाळीच्या पार्श्वभूमीवर प्रशासनानं वायू प्रदूषण रोखण्यासाठी मोहिम हाती घेतलीय...मात्र या मोहिमेकडे बॉलीवूडमधील सेलिब्रेटींनी पाठ फिरवल्यानं उच्च न्यायालयानं खडेबोल सुनावलेत. न्यायालयानं संताप व्यक्त करताना प्रशासनाला काय ताकीद दिलीय? पाहूयात या रिपोर्टमधून.
मुंबईतील सण-उत्सवांच्या काळात होणारी फटाक्यांची आतषबाजी आणि त्यामुळे वाढणारे ध्वनिप्रदूषण, वायुप्रदूषण या गंभीर मुद्द्यावर मुंबई उच्च न्यायालयानं आक्रमक भूमिका घेतलीय.. प्रदूषणमुक्तीच्या जनजागृती मोहिमेसाठी मानधन मागणाऱ्या बॉलिवूडच्या सेलिब्रेटींना उच्च न्यायालयानं चांगलेच खडेबोल सुनावलेत... "मुंबईने तुम्हाला सर्वकाही भरभरून दिले आहे, आता सामाजिक कर्तव्य म्हणून सेलिब्रिटींनी या शहराची परतफेड करायला हवी," अशा थेट शब्दांत न्यायमूर्तींनी सेलिब्रेटींचे कान उपटलेत. नेमकं प्रकरण काय पाहूयात...
ध्वनिप्रदूषण रोखण्याच्या मोहिमेत बॉलिवूड सेलिब्रेटींना सहभागी करून घेण्याचे निर्देश न्यायालयाने मागील सुनावणीदरम्यान दिले...
मात्र, सर्व सेलिब्रेटींचे ठरावीक मानधन असते आणि अशा सामाजिक उपक्रमांसाठीही ते विनामूल्य काम करण्यास तयार होत नाहीत, अशी माहिती अतिरिक्त सरकारी वकील ज्योती चव्हाणांनी न्यायालयाला दिली.
न्यायमूर्ती गिरीश कुलकर्णी आणि न्यायमूर्ती नीला गोखले यांच्या खंडपीठानं यावर सामाजिक कार्यासाठी पैसे मागणारे सेलिब्रिटी विनामूल्य काम करणार नसतील, तर त्यांच्याकडे जाण्याची मुळीच गरज नाही.
सर्वसामान्यांच्या करातून जमा झालेला सरकारी निधी या सेलिब्रिटींवर उधळू नका, असे सक्त आदेशच न्यायालयाने राज्य सरकारला दिले...
एकीकडे बॉलीवुड कलाकारांनी जनजागृतीसाठी पुढे आले नसले तरी काही मराठी कलाकार मुंबई महापालिकेतर्फे नागरिकांना फटाकेमुक्त दिवाळी साजरी करण्याचं आवाहन करतायत...दिवाळीच्या पार्श्वभूमीवर महापालिका, पोलीस प्रशासन आणि महाराष्ट्र प्रदूषण नियंत्रण मंडळाने (एमपीसीबी) कागदावर आखलेल्या उपाययोजनांचे कौतुक केले असले, तरी प्रत्यक्ष ग्राऊंडवरील अंमलबजावणीवर न्यायालयाने तीव्र नाराजी व्यक्त केलीय...
मात्र मुंबईत नाव, प्रसिद्धी आणि अफाट पैसा कमावणारे बॉलिवूडचे कलाकार सामाजिक जबाबदारीवेळी हात वर करत असतील तर खरच हे समाजासाठी हिरो आहेत का? मात्र आता न्यायालयानं थेट फटकारल्यामुळे मुंबईत अमाप पैसा कमावणारे किती बॉलिवूड सेलेब्रिटी मोफत जनजागृतीसाठी पुढे येतात याकडे सर्वांचं लक्ष लागलंय.
ब्युरो रिपोर्ट, साम टिव्ही