संजय गडदे, साम टीव्ही प्रतिनिधी

Gas Cylinder Explosion : मुंबईतील साकीनाका परिसरातील पाइपलाइन भागात एक भयंकर दुर्घटना घडली आहे. अचानक लागलेल्या भीषण आगीमुळे परिसरात एकच खळबळ उडाली आहे. आगीच्या या घटनेत ४ ते ५ गॅस सिलिंडरचे स्फोट झाल्याची माहिती समोर आली आहे. परिसरात धुराचे लोळ पसरल्यामुळे नागरिकांमध्ये भीतीचे वातावरण आहे.

मिळालेल्या प्राथमिक माहितीनुसार, साकीनाका येथील पाइपलाइन परिसरात अचानक आग भडकली. आग नेमकी कशामुळे लागली, याचे नेमके कारण अद्याप समजू शकलेले नाही. मात्र, आगीच्या या दुर्घटनेत गॅस सिलिंडरचे एकापाठोपाठ एक स्फोट झाल्यामुळे आजूबाजूच्या परिसरात तीव्र धुराचे लोट पसरले.

आगीची माहिती मिळताच अग्निशमन दलाच्या ६ गाड्या तात्काळ घटनास्थळी दाखल झाल्या. अग्निशमन दलाचे पथक घटनास्थळी दाखल झाले असून, आगीवर पूर्णपणे नियंत्रण मिळवण्याचे प्रयत्न युद्धपातळीवर सुरू आहेत. या दुर्घटनेत जिविताहानीबाबत कोणतीही अपडेट समोर आलेली नाही. दुर्घटनेची माहिती मिळताच पोलिसांनीही धाव घेत गर्दीवर नियंत्रण मिळवले.

दरम्यान, या भीषण आगीत नेमके कशा प्रकारचे नुकसान झाले आहे आणि कोणी जखमी झाले आहे का, याबाबतची कोणतीही अधिकृत माहिती अद्याप समोर आलेली नाही. अग्निशमन दल आणि स्थानिक प्रशासनाकडून परिस्थिती नियंत्रणात आणण्याचे शर्थीचे प्रयत्न सुरू आहेत. सिलिंडरचे स्फोट का झाले? आग कशी लागली? याचा तपास केला जात आहे.