संजय गडदे, साम टीव्ही

मुंबईच्या मालाडमध्ये महिलेवर बलात्कार करून हत्या केल्याची घटना घडली आहे. मालाडच्या मालवणी परिसरात ही घटना घडली. महिलेच्या हत्येने परिसरात खळबळ उडाली. या हत्या प्रकरणामुळे मुंबईतील महिला सुरक्षेचा प्रश्न ऐरणीवर आला आहे. या प्रकरणी पोलिसांनी एकाला उत्तर प्रदेशातून अटक केली आहे.

मिळालेल्या माहितीनुसार, मुंबईच्या मालाडमधील मालवणीतील सावंत कंपाऊंड, मार्वे रोडजवळ महिलेचा मृतदेह आढळला होता. त्यानंतर पोलिसांच्या प्राथमिक तपासात ४५ वर्षीय महिलेवर बलात्कारानंतर गळा आवळून खून झाल्याचे स्पष्ट झाले. मालवणी परिसरातील या संतापजनक घटनेचा पोलिसांकडून अखेर उलगडा झाला.

या गुन्ह्याची गंभीर दखल घेत वरिष्ठ पोलीस अधिकाऱ्यांच्या मार्गदर्शनाखाली विशेष पथकाने आरोपीचा शोध सुरू केला. मोबाईल लोकेशनचे तांत्रिक विश्लेषण आणि सीसीटीव्ही फुटेजच्या आधारे पोलिसांनी आरोपी चंद्रपाल (वय ३४) याला मथुरा येथून अटक केली. त्यानंतर पोलिसांच्या सखोल चौकशीत त्याने गुन्ह्याची कबुली दिली.

आरोपीला ट्रान्झिट रिमांडनंतर मुंबईत आणून न्यायालयात हजर करण्यात आलं. त्यास ६ ऑक्टोबरपर्यंत पोलिस कोठडी सुनावली आहे. ही कारवाई पोलिस आयुक्त देवेन भारती यांच्या मार्गदर्शनाखाली, अपर आयुक्त शशीकुमार मीना, उपायुक्त संदीप जाधव, सहा. आयुक्त निता पाडवी यांच्या नेतृत्वाखाली तसेच वरिष्ठ पोलीस निरीक्षक शैलेंद्र नगरकर आणि पोलीस निरीक्षक जीवन भातकुले, पोलीस उपनिरीक्षक अरुण सावंत, सपोनी शिळमकर, सपोनी विचारे, पोउनि हिंडे, पोउनी मासाळ या सर्व तपास अधिकाऱ्यांच्या अथक प्रयत्नांतून पार पडली.