Mumbai Mira Road Kashimira Murder Case मुंबईतील मीरा रोड परिसरातून धक्कादायक घटना समोर आली आहे. आईच्या कथित बॉयफ्रेंडने तिच्या 4 वर्षांच्या निरागस मुलाची निर्घृण हत्या केली. क्षुल्लक कारणांवरुन ही हत्या करण्यात आल्याचे तपासात उघड झाले आहे. या प्रकरणामुळे संपूर्ण परिसरात खळबळ उडाली आहे. या प्रकरणी पोलिसांनी मृत मुलाच्या आईचा बॉयफ्रेंड शंभू शर्माला (Shambhu Sharma) अटक केली असून त्याच्याविरोधात हत्येचा गुन्हा दाखल करण्यात आला आहे. ही घटना काशिमीरा पोलीस ठाण्याच्या हद्दीत घडली.

पोलिसांनी दिलेल्या माहितीनुसार, मृत मुलाची आई शंभू शर्मा याच्यासोबत लिव्ह-इन रिलेशनशिपमध्ये राहत होती. घटनेच्या दिवशी आरोपी आणि मुलगा घरात असताना क्षुल्लक कारणांवरुन आरोपीने मुलाला अमानुष मारहाण केल्याचा आरोप आहे. या मारहाणीत गंभीर दुखापत झाल्याने चिमुकल्याचा मृत्यू झाला.

मुलाचा मृत्यू झाल्यानंतर आरोपीने हा नैसर्गिक मृत्यू असल्याचे भासवण्याचा प्रयत्न केल्याचे तपासात समोर आले आहे. मात्र, पोलिसांनी घटनास्थळी पंचनामा करताना मुलाच्या शरीरावर संशयास्पद जखमा आढळून आल्या. त्यामुळे पोलिसांनी मृतदेह शवविच्छेदनासाठी पाठवला. शवविच्छेदन अहवालात मुलाचा मृत्यू गंभीर दुखापतींमुळे झाल्याचे स्पष्ट झाले.

त्यानंतर पोलिसांनी संशयाच्या आधारे शंभू शर्मा याला ताब्यात घेतले. चौकशीदरम्यान त्याने मुलाला मारहाण केल्याची कबुली दिल्याची माहिती पोलिसांनी दिली आहे. मंगळवारी, २ जून रोजी आरोपीविरोधात हत्येचा गुन्हा दाखल करण्यात आला. मात्र, आरोपीने नेमक्या कोणत्या कारणातून मुलावर हल्ला केला, यामागील हेतू अद्याप स्पष्ट झालेला नाही. या हृदयद्रावक घटनेमुळे परिसरातील नागरिकांमध्ये संतापाची भावना व्यक्त होत आहे. पोलिसांनी या प्रकरणाचा तपास सुरू ठेवला आहे.