मुंबईतून धक्कादायक घटना समोर आली आहे. एका महिला समलैंगीक जोडप्यांमध्ये झालेल्या पूर्वीच्या वादातून प्रेयसीची हत्या करण्यात आली आहे. या घटनेने सांताक्रूझ परिसरात खळबळ उडाली आहे. याप्रकरणी पोलिसांनी तरुणीला ताब्यात घेतले असून पुढील तपास सुरु केला आहे. कमला संजय कांबळे उर्फ प्रीती असे आरोपीचे नाव आहे. मृत तरुणीचे नाव रेश्मा ढोणे आहे.

मिळालेल्या माहितीनुसार, मुंबईतील सांताक्रूझमध्ये रेश्मा आणि प्रीती वास्तव्यास होत्या. दोघीपण एकमेकांना दीर्घकाळापासून ओळखत होत्या. दोघी घरकाम करुन उदरनिर्वाह करत होत्या. प्राथमिक तपासात दोघी रिलेशनशीपमध्ये असल्याचं समोर आलं आहे. दरम्यान कमलाच्या घरी पार्टी सुरु असताना रात्री साडेअकरा वाजताच्या सुमारास दोघींमध्ये जोरदार भांडण सुरु झाल.

रेश्मा तिच्या घरी न येण्यावरुन हा वाद सुरू झाला होता. या वादाचे रूपांतर हाणामारीत झाले आणि रागाच्या भरात कमलाने घरात पडलेला चाकू उचलून रेश्माच्या छातीत खुपसला. रेश्माचा आवाज ऐकून शेजाऱ्यांनी पोलिसांना माहिती दिली. ऑन ड्युटी असलेल्या पोलिसांनी जखमी अवस्थेत रेश्माला रुग्णालयात नेले.

मात्र तिथे तिला मृत घोषित करण्यात आले. पोलिसांनी घटनास्थळावरून कमला कांबळेला ताब्यात घेतले आणि भारतीय न्याय संहितेच्या कलम १०३ अंतर्गत अटक केली. रेश्माच्या मुलाच्या तक्रारीवरून एफआयआर नोंदवण्यात आला आहे. पुढील तपास सुरू असल्याचे एका पोलीस अधिकाऱ्याने सांगितले.