बॉयफ्रेंडच्या त्रासाला कंटाळून मुंबईमध्ये एका १७ वर्षीय मुलीने आत्महत्या केल्याची धक्कादायक घटना समोर आली आहे. गोरेगावमध्ये राहत्या घरी या मुलीने गळफास घेत आयुष्य संपवलं. एआयचा वापर करून मॉर्फ फोटो तयार करून तो सोशल मीडियावर पोस्ट करण्याची धमकी या मुलीला दिली जात होती. बॉयफ्रेंडच्या या त्रासाला कंटाळून तिने टोकाचे पाऊल उचलले.या प्रकरणी पोलिसांनी आरोपीविरोधात गुन्हा दाखल करत तपास सुरू केला आहे.

मिळालेल्या माहितीनुसार, गोरेगावमध्ये राहणाऱ्या १७ वर्षीय मुलीचे एका तरुणासोबत प्रेमसंबंध होते. दोघेही एकाच परिसरात राहत होते. ही तरुणी ऑगस्ट महिन्यामध्ये तरुणासोबत पळून गेली होती. दोघेही चेन्नईला गेले होते. मुलीच्या कुटुंबीयांनी तिचा शोध घेत तिला घरी परत आणले होते आणि तरुणासोबत यापुढे बोलू नको आणि त्याला भेटू नको सांगितले होते. मुलीने या तरुणासोबत बोलणं सोडलं. आरोपी तरुणाने एआय तंत्रज्ञानाचा वापर करून मुलीचे काही अश्लिल फोटो तयार केले.

या फोटोच्या माध्यमातून तो तिला धमकी देऊ लागला. सोशल मीडियावर हे फोटो व्हायरल करेल असं धमकावत तो तिच्याकडे पैशांची मागणी करत होता. यामुळे घाबरलेल्या मुलीने घरातून काही पैसे चोरले आणि बॉयफ्रेंडला दिले. घरातील पैसे चोरीला गेल्याचे कळताच मुलीच्या वडिलांनी पोलिस ठाण्यात धाव घेत तक्रार दाखल केली होती. या प्रकरणी गुन्हा दाखल करून पोलिसांनी आरोपी तरुणाला ताकीद देत सोडून दिले होते.

पण आरोपीकडून सतत होत असलेल्या ब्लॅकमेलिंगमुळे मुलगी मानसिक तणावात गेली होती. त्यामुळे तिने बुधवारी घरात कुणी नसताना गळफास घेत आत्महत्या केली. या घटनेनंतर मुलीचा बॉयफ्रेंड फरार झाला. पोलिसांनी त्याच्याविरोधात भारतीय न्याय संहितेच्या कलम १०८ अतंर्गत गुन्हा दाखल करत शोध सुरू केला आहे. पोलिस या प्रकरणाचा तपास करत आहेत. या घटनेमुळे गोरेगावमध्ये खळबळ उडाली आहे.