Mumbai News: कोरोना रुग्णांचा (Corona Patient) वाढता आकडा रोखण्यासाठी मुंबई महानगर पालिकेकडून (BMC) नाकावाटे कोरोना लस देण्याची मोहीम सुरु करण्यात आली. पण या लसीकरण मोहिमेला (Vaccination) नागरिकांकडून चांगला प्रतिसाद मिळत नसल्याची बाब समोर आली आहे. नाकावाटे कोरोना लस घेण्यास मुंबईकरांनी पाठ फिरवली आहे. कारण हे लसीकरण सुरु होऊन 12 दिवस झाले. तेव्हापासून ते आतापर्यंत फक्त 81 नागरिकांनी लस घेतल्याचे समोर आले आहे.

कोरोनाबाधितांचा आकडा कमी होत असला तरी 29 एप्रिल रोजी मुंबई महानगरपालिकेने नाकाद्वारे देण्यात येणाऱ्या इन्कोव्हॅक लसीकरणाचा शुभारंभ केला होता. 60 वर्षांवरील पात्र नागरिकांना कोविशिल्ड अथवा कोवॅक्सीनची दुसरी मात्रा घेतल्यानंतर सहा महिन्यांनी इन्कोव्हॅक (iNCOVACC) लसीची प्रतिबंधात्मक मात्रा देण्यात येत आहे. या लसीकरणाचा शुभारंभ होऊन 12 दिवस झाले तरी 100 लाभार्थ्यांचा आकडा पार होऊ शकलेला नाही.

या लसीकरण मोहीमेला सुरुवात झाल्यापासून केवळ 81 नागरिकांनी ही लस घेतल्याची माहिती समोर आली आहे. महापालिकेच्या 24 प्रभागात एक लसीकरण केंद्राची व्यवस्था करण्यात आली आहे. एकंदरीतच नाकाद्वारे लस घेण्यात नागरिकांनी नापसंती व्यक्त केली आहे. या लसीकरणाला नागरिकांनी पाठ फिरवल्यामुळे नेमकी मुंबईकरांना कोरोनाची भीती वाटते की नाही? असा प्रश्न उपस्थित केला जात आहे.

दरम्यान, मुंबईत कोरोनाचा वेग मंदावला आहे. मंगळवारी मुंबईत कोरोनाचे 56 नवीन रुग्ण आढळले आहेत. बृहन्मुंबई महानगरपालिकेने (BMC) एका आरोग्य बुलेटिनमध्ये सांगितले की, 'मुंबईत मंगळवारी 56 नवीन कोरोना रुग्णांची नोंद झाली आहे. अशापद्धतीने मुंबईतील एकूण कोरोना रुग्णांचा आकडा 1,163,352 वर पोहोचला आहे. मंगळवारी कोणत्याही कोरोना रुग्णाच्या मृत्यूची नोंद झाला नाही.'