Mumbai Bengaluru Sleeper Vande Bharat : मुंबई आणि बंगळुरू या दोन प्रमुख शहरांना जोडणाऱ्या बहुप्रतिक्षित 'स्लीपर वंदे भारत एक्स्प्रेस'चा प्रस्तावित मार्ग आणि वेळापत्रक रेल्वे बोर्डाकडून समोर आले आहे. ही नवी स्लीपर ट्रेन सोलापूर मार्गे चालवण्याचा निर्णय घेण्यात आल्याची माहिती मिळाली आहे. त्यामुळे एका बाजूला सोलापूरकरांमध्ये आनंदाचे वातावरण आहे, तर दुसऱ्या बाजूला कोल्हापूर, सांगली, सातारा आणि बेळगाव परिसरातील प्रवाशांमधून तीव्र नाराजी व्यक्त केली जात आहे.

पश्चिम महाराष्ट्र आणि उत्तर कर्नाटकचा पत्ता कट

रेल्वेने तयार केलेल्या नवीन आराखड्यानुसार ही गाडी मुंबई सोलापूर-पुणे मार्गे धावणार आहे. यामुळे मिरज, सांगली, सातारा, कराड, कोल्हापूर तसेच कर्नाटकातील बेळगावी, हुबळी, धारवाड, दावणगेरे या महत्त्वाच्या शहरांना या वेगवान ट्रेनची थेट कनेक्टिव्हिटी मिळणार नाही. या भागातील लोकप्रतिनिधी आणि प्रवाशांनी ही ट्रेन मिरज-बेळगावी मार्गे नेण्याची मागणी केली होती. मात्र, सोलापूर मार्गाला प्राधान्य दिल्याने पश्चिम महाराष्ट्राच्या हातातून ही मोठी संधी निसटल्याची भावना व्यक्त होत आहे.

कोणत्या मार्गाने धावणार, थांबे कोणते असणार?

मुंबई-बंगळुरू ही स्लीपर वंदे भारत एक्स्प्रेस १,१३७ किलोमीटरचे अंतर कापणार आहे. या प्रवासाचा वेळ अंदाजे १५ ते १६ तासांवर येणार आहे. सीएसएमटी मुंबई, कल्याण, पुणे, सोलापूर, कलबुर्गी, वाडी, रायचूर, गुंतकल, अनंतपूर, धर्मावरम आणि केएसआर बंगळुरू या स्थानकावर एक्सप्रेस थांबणार आहे.

वेळापत्रक आणि आठवड्यातून किती दिवस?

रेल्वे बोर्डाच्या प्रस्तावानुसार ही ट्रेन आठवड्यातून ६ दिवस धावणार आहे. बंगळुरू ते मुंबई (ट्रेन क्र. २७६५२): ही वंदे भारत एक्सप्रेस बंगळुरूहून रात्री १०:०० वाजता सुटेल आणि दुसऱ्या दिवशी दुपारी १:५० वाजता मुंबई सीएसएमटी येथे पोहोचेल. (सोमवार वगळता)

मुंबई ते बंगळुरू (ट्रेन क्र. २७६५१): ही वंदे भारत एक्सप्रेस मुंबईवरून दुपारी २:५० वाजता सुटेल आणि दुसऱ्या दिवशी सकाळी १०:३० वाजता बंगळुरू येथे पोहोचेल. (मंगळवार वगळता)

ही पूर्णपणे वातानुकूलित (AC) स्लीपर ट्रेन असणार असून यात ३-टियर एसी, २-टियर एसी आणि १-टियर एसी (फर्स्ट क्लास) असे तीन वर्ग असतील.

अंदाजित तिकीट दर:

नवीन स्लीपर वंदे भारतमुळे मुंबई-पुणे-सोलापूर ते बंगळुरूदरम्यानचा प्रवास अत्यंत वेगवान आणि आरामदायी होणार आहे. ३-टियर एसीचे तिकिट अंदाजे ₹२,२०० ते ₹२,५००, २-टियर एसीचे तिकिट ₹३,२०० ते ₹३,६०० तर फर्स्ट एसीचे भाडे ₹४,००० ते ₹४,५०० च्या दरम्यान असण्याची शक्यता आहे. (अधिकृत भाडेपत्रक रेल्वेकडून लवकरच जाहीर केले जाईल.)