मुंबईला पाणीपुरवठा करणाऱ्या सात प्रमुख तलावांमध्ये यंदा समाधानकारक पाणीसाठा जमा झाला आहे. आजच्या आकडेवारीनुसार, सातही तलावांमध्ये मिळून 13,57,667 दशलक्ष लिटर पाणीसाठा आहे. हा साठा एकूण उपयुक्त जलसाठ्याच्या 93.80 टक्के इतका आहे. त्यामुळे आगामी काळातील मुंबईच्या पाणीपुरवठ्याबाबत मोठा दिलासा मिळाला आहे.

मुंबईला पाणीपुरवठा करणाऱ्या सात तलावांपैकी विहार, तुळशी आणि मोडक सागर हे तीन तलाव 100 टक्के भरले आहेत. तानसा तलावात 99.58 टक्के, मध्य वैतरणामध्ये 97.11 टक्के, भातसा तलावात 92.84 टक्के, तर अप्पर वैतरणामध्ये 85.82 टक्के पाणीसाठा आहे. तलावनिहाय पाणीसाठा पाहता, अप्पर वैतरणामध्ये 1,94,854 दशलक्ष लिटर, मोडक सागरमध्ये 1,28,925 दशलक्ष लिटर, तानसामध्ये 1,44,475 दशलक्ष लिटर, मध्य वैतरणामध्ये 1,87,937 दशलक्ष लिटर आणि भातसा तलावात सर्वाधिक 6,65,732 दशलक्ष लिटर पाणी आहे. विहारमध्ये 27,698 तर तुळशीमध्ये 8,046 दशलक्ष लिटर पाणीसाठा आहे.

दरम्यान, गेल्या 24 तासांत तलावांच्या पाणलोट क्षेत्रात हलक्या ते मध्यम स्वरूपाचा पाऊस झाला. मोडक सागर येथे सर्वाधिक 54 मिमी पावसाची नोंद झाली. अप्पर वैतरणा येथे 52 मिमी, मध्य वैतरणा 51 मिमी, तानसा 46 मिमी, भातसा 20 मिमी, तुळशी 16 मिमी आणि विहार येथे 29 मिमी पाऊस झाला. विहार तलाव 7 जुलैपासून ओसंडून वाहत आहे.

तानसा धरणातूनही काही दिवस पाण्याचा विसर्ग सुरू होता. मात्र, सध्या परिस्थितीत काहीसा बदल झाला असून मध्य वैतरणा डब्ल्यूएससीपीओ गेट बंद आहे. तसेच अप्पर वैतरणामधून 6 जुलैपासून पाण्याचा विसर्ग बंद ठेवण्यात आला आहे. एकूणच, सातही तलावांमध्ये 93 टक्क्यांहून अधिक पाणीसाठा असल्याने मुंबईच्या पाणीपुरवठ्याच्या दृष्टीने यंदाची स्थिती दिलासादायक असल्याचे चित्र आहे