कल्याण : उधारीचे पैसे देण्यास उशीर झाला म्हणून आई आणि मुलाला बेदम मारहाण झाल्याची घटना उल्हासनगरच्या भय्यासाहेब आंबेडकर नगर परिसरात घडली आहे.याप्रकरणी उल्हासनगर पोलीस ठाण्यात आरोपींविरोधात गुन्हा दाखल करण्यात आला असून आरोपी मात्र फरार झाले आहेत.

निखिल चाबुकस्वार आणि मीना चाबुकस्वार असं जखमी झालेल्या मुलगा आणि आईचे नाव आहे.निखिल याने त्याच परिसरात राहणारे गणेश कांबळे आणि आकाश गायकवाड यांच्याकडून उधारीवर तीन हजार रुपये घेतले होते. ते पैसे देण्यास उशीर झाला म्हणून निखिल याच्यावर चाकू आणि लाकडी दांडक्याने हल्ला करण्यात आला.

निखिलच्या मदतीला गेलेल्या आईला देखील बेदम मारहाण करण्यात आली. ह्या मारहाणीत निखिल आणि मीना हे दोघे गंभीर जखमी झाले असून सध्या त्यांच्यावर उल्हासनगरच्या मध्यवर्ती रुग्णालयात उपचार सुरू आहेत.

दरम्यान निखिलचे वडील भाजीपाल्याची हातगाडी लावण्यासाठी गेले असता त्याठिकाणी सुद्धा आरोपी यांनी दबाव आणून बेदम मारहाण केली. या घटनेनंतर चाबुकस्वार कुटुंबीय दहशतीच्या वातावरणात जगत असून पोलिसांनी तात्काळ आरोपी आकाश गायकवाड आणि गणेश कांबळे यांना अटक करून न्याय द्यावा अशी मागणी निखिल आणि त्याची आईने केलीय.