Monsoon News updates in Marathi: महाराष्ट्रातील अनेक जिल्ह्यांमधये पूर्व मोसमी पावसाने हजेरी लावली आहे. भारतीय हवामानशास्त्र विभागाने अंदाज वर्तवला आहे की, येत्या दोन दिवसांत राज्यात हवामान कोरडे राहण्याची शक्यता आहे.

यातच कोकण-गोव्यात तुरळक ठिकाणी गुरुवारी पावसाने हाजरी लावली आहे. तर विदर्भात शनिवारी आणि रविवारी काही भागात पाऊस पडण्याची शक्यता हवामानशास्त्र विभागाने वर्तविली आहे.

विदर्भ, मराठवाडा, कर्नाटक, तमिळनाडूपर्यंत कमी दाबाचा पट्टा तयार झाला आहे. दरम्यान, विदर्भात बहुतांश ठिकाणी, मराठवाड्यात आणि मध्य महाराष्ट्रात काही ठिकाणी कमाल तापमान ४० अंश सेल्सिअसपेक्षा अधिक नोंदविले आहे. उर्वरित राज्यात कमाल तापमानाचा पारा ३४ ते ४० अंश सेल्सिअस इतका होता. राज्यात अकोला येथे ४३.७ अंश सेल्सिअस अशा उच्चांकी तापमानाची नोंद झाली. (Latest Marathi News)

पुण्यात हलक्या पावसाची शक्यता

पुण्यात गुरुवारी दुपारी आणि संध्याकाळी आकाश अंशत: ढगाळ राहण्याची शक्यता असून काही ठिकाणी मेघगर्जनेसह विजांचा कडकडाट होऊन अति हलक्या स्वरूपाचा पाऊस पडेल, असा अंदाज हवामानशास्त्र विभागाने दिला आहे.

तसेच शुक्रवार ते रविवार दरम्यान आकाश निरभ्र राहून दुपारी आणि संध्याकाळी  अंशत: ढगाळ राहील, असे हवामानशास्त्र विभागाने सांगितले आहे. पुण्यात बुधवारी ३९.६ अंश सेल्सिअस इतके कमाल तापमान नोंदविण्यात आले.

दरम्यान, नैऋत्य मोसमी वाऱ्यांनी संपूर्ण अंदमान निकोबार यांसह बंगालच्या उपसागराच्या आणखी काही भागात प्रवेश केला आहे. दरम्यान अरबी समुद्रातील आगमनासाठी अनुकूल वातावरण तयार होत आहे. येत्या दोन-तीन दिवसांत मालदिव आणि कोमोरिन यासह बंगालच्या उपसागराचा उर्वरित भागात मान्सून दाखल होण्याची शक्यता आहे.