सिद्धेश म्हात्रे, नवी मुंबई

नवी मुंबईच्या वाशीतील एपीएमसी पोलीस ठाण्याच्या हद्दीत एक भयंकर घटना घडलीय. लेक आणि आईच्या नात्याला काळीमा फासणाऱ्या घटनेमुळे तुर्भे हादरलंय. अल्पवयीन मुलीला आईने आपल्याच प्रियकरासोबत शारीरिक संबंध ठेवण्यास भाग पाडले होते. 'लग्नानंतर तुला हेच करायचंय, तू हे शिकलं पाहिजे', असं म्हणत आईने मुलीला भयंकर कृत्य करण्यास भाग पाडले. या घटनेनंतर परिसर हादरले असून, विकृत आई आणि तिच्या प्रियकराला पोलिसांनी ताब्यात घेतलंय.

आई आणि लेकीचं नातं निर्मळ आणि मैत्रीणीप्रमाणे असतं. पण याच नात्याला कलंक लावण्याचं काम एका आईनं केलंय. तुर्भे सेक्टर २२मधील एपीएमसी पोलीस ठाण्याच्या हद्दीत एक हादरवणारी घटना घडली आहे. एका आईनं लेकीला आपल्याच प्रियकरासोबत शारीरिक संबंध ठेवण्यास जबरदस्ती केलीय. 'लग्नानंतर तुला हेच करायचंय, तू हे शिकलं पाहिजे', असं म्हणत आईनं लेकीला विचित्र कृत्य करण्यास भाग पाडलंय.

तसेच याआधी आई आणि प्रियकराने अल्पवयीन मुलीसमोरच अनेक वेळा शारीरिक संबंध ठेवले होते. या गोष्टी वारंवार घडत होत्या. मात्र, ती कुठेही ही गोष्टी सांगू शकली नाही. कारण कुणालाही काहीही न सांगण्याची धमकी आई आणि प्रियकराने दिली होती. मात्र, विक्षिप्त गोष्टीला त्रासलेल्या मुलीनं एपीएमसी पोलिसांत तक्रार दाखल करण्याचे ठरवले.

अल्पवयीन मुलीने मित्राच्या मदतीने घटनेला वाचा फोडत पोलीसांना आपबिती सांगितली. पोलिसांनी तातडीने या घटनेचं गांभीर्य जाणून घेत तपास केला. तसेच एपीएमसी पोलिसांनी तात्काळ गुन्हा दाखल करत, विकृत आई आणि तिच्या प्रियकराला अटक केली आहे. या भयंकर प्रकरणानंतर नवी मुंबई हादरली असून, या घटनेचा अधिक तपास पोलीस करीत आहेत.