मुंबईत घर घेण्याचे अनेकांची स्वप्न असते. परंतु मुंबईत परवडणारे घर घेणे खूप अवघड आहे. त्यामुळेच म्हाडा प्राधिकरणाने नेहमी लॉटरी काढत असते. नव्या वर्षात सुमारे अडीच ते तीन हजार घरांची लॉटरी काढली जाणार आहे. मुंबईत राहत असलेल्या नागरिकांचे घरांचे स्वप्न साकार करण्यासाठी म्हाडा प्राधिकरण सातत्याने प्रयत्न करत असून आता नव्या वर्षांमध्ये प्राधिकरणाकडून सुमारे अडीच ते तीन हजार घरांची लॉटरी काढण्याचे नियोजन आहे. (MHADA Lottery)

सूत्रांनी दिलेल्या माहितीनुसार, दिवाळीच्या आसपास ही लॉटरी काढली जाईल. या लॉटरी मधील घरे अत्यल्प आणि अल्प गटासाठी अधिकाधिक राखीव ठेवण्यासाठी प्राधिकरण काम करत असून घरांच्या किमती देखील कमी राहतील यासाठी प्राधिकरणाकडून प्रयत्न केला जाणार आहेत.

म्हाडाच्या मुंबई आणि कोकण मंडळाकडून वर्षातून किमान दोन लॉटरी काढल्या जातात. कोकण मंडळाच्या लॉटरीतील घरांना सेवा सुविधा कमी असल्याने तिकडे नागरिकांचा कल कमी असतो. मात्र घरांची बाजारपेठ म्हणून ओळखल्या जाणाऱ्या मुंबईत घर घेण्यासाठी म्हाडाकडे लाखोने अर्ज येतात. (Mhada Lottery 2025)

म्हाडाच्या विश्वसनीय सूत्राने दिलेल्या माहितीनुसार, नव्या वर्षांमध्ये नव्या घरांचे बांधकाम सुरू केले जाणार आहे. आता गोरेगाव पहाडी येथे घरांचे बांधकाम सुरू आहे. दोन वर्षांमध्ये गोरेगाव पहाडी येथे अडीच हजार घरे बांधली जाणार आहेत. नव्या वर्षात या घरांमधील काही घरांचा समावेश लॉटरीमध्ये केला जाईल.

दरम्यान, मुंबई मंडळाकडून काढण्यात आलेल्या यापूर्वीच्या लॉटरीमधील सुमारे २ हजार घरांच्या किमती जास्त आहेत .त्यामुळे प्राधिकरणावर टीका झाली होती.

अंधेरी, जुहु, गोरेगांव, कांदिवली, बोरीवली, विक्रोळी, घाटकोपर, पवई, ताडदेव, सायन येथे घरे असतील.नव्या वर्षात दिवाळीमध्ये लॉटरी काढण्याची म्हाडाची तयारी असली तरी ठोस कालावधी निश्चित करण्यात आलेला नाही. परंतु लवकरात लवकर अडीच ते तीन हजार घरांची लॉटरी करण्यासाठी म्हाडा काम करत आहे.

कोकण मंडळ लॉटरी

म्हाडाच्या कोकण गृहनिर्माण व क्षेत्रविकास मंडळातर्फे २२६४ सदनिकांच्या विक्रीकरिता जाहीर सोडतीकरिता ऑनलाईन अर्ज सादर करण्यासाठी मुदतवाढ देण्यात आली असून ६ जानेवारी रोजी रात्री ११.५९ वाजेपर्यंत अर्जदारांना अर्ज सादर करता येणार आहे.