घर घेण्याचे स्वप्न पाहणाऱ्यांसाठी महत्त्वाची बातमी आहे. आता म्हाडाच्या घरांसाठी लॉटरी जाहीर होणार आहे. म्हाडाच्या कोकण मंडळाकडून ठाणे, कल्याण, घोटेघर आणि डोंबिवलीत घरांसाठी लॉटरी निघणार आहे.यामुळे तुमचे ठाणे, डोबिंवलीसारख्या परिसरात घर घेण्याचे स्वप्न पूर्ण होणार आहे.

फेब्रुवारीत निघणार लॉटरी

कोकण मंडळाकडून दोन हजार घरांसाठी जाहिरात फेब्रुवारीमध्ये काढली जाणार आहे. यानंतर आता एप्रिल- मे महिन्यात ही लॉटरी निघणार आहे. यामुळे घर घेणाऱ्यांना दिलासा मिळणार आहे.

मुंबईसह एमएमआरमध्ये घरांच्या किंमती गगनाला भिडल्या आहेत. यामुळे खासगी विकासकांकडे घर घेणे हे सर्वसामान्यांच्या खिशाला परवडणारे नाही. त्यामुळे अनेकजण म्हाडाच्या लॉटरीची वाट पाहत असतात. म्हाडाच्या मुंबई मंडळाची ऑक्टोबरमध्ये घरांच्या लॉटरीची जाहिरात येणे अपेक्षित होती. मात्र, पुरेशी घरे उपलब्ध नसल्याने लॉटरी जाहीर झालेली नव्हती. यामुळे नागरिकांमध्ये नाराजीचे वातावरण होते.

घर घेणाऱ्यांना दिलासा

आता म्हाडाच्या कोकण मंडळाने फेब्रुवारीमध्ये दोन हजारांपेक्षा अधिक घरांसाठी लॉटरी काढण्याची प्रक्रिया सुरु केली आहे.त्यामध्ये खासगी विकसकांकडून म्हाडाला मिळणाऱ्या १५ टक्के आणि २० टक्क्यांमधून मिळणाऱ्या घरांबरोबरच प्रधानमंत्री आवास योजनेतील घरांचा समावेश असणार आहे.

कोकण मंडळाच्या ठाणे, कल्याण परिसरातील घरांना मोठी मागणी आहे. २०२५ मध्ये ५ हजार घरांसाठी दीड लाख अर्ज आले होते. त्यामुळे यावेळीदेखील लॉटरीला खूप चांगला प्रतिसाद मिळू शकतो, असं सांगितलं जात आहे.