संजय गडदे, साम टीव्ही

मुंबई: महाराष्ट्र गृहनिर्माण व क्षेत्रविकास प्राधिकरणाच्या (म्हाडा) 2026-27 या आर्थिक वर्षासाठी सादर करण्यात आलेल्या 17,430.73 कोटी रुपयांच्या अर्थसंकल्पाला प्राधिकरणाची मंजुरी मिळाली आहे. या अर्थसंकल्पात राज्यभरात एकूण 13,012 सदनिकांचे बांधकाम करण्याचे महत्त्वाकांक्षी उद्दिष्ट ठेवण्यात आले आहे. या योजनेसाठी बांधकाम खर्चाकरिता 10,585.12 कोटी रुपयांची तरतूद करण्यात आली असून, विविध प्रादेशिक मंडळांमार्फत ही घरे उभारली जाणार आहेत.

मुंबई मंडळाअंतर्गत 2,538 सदनिकांचे बांधकाम प्रस्तावित असून, यासाठी 6,747.42 कोटी रुपयांची तरतूद आहे. कोकण मंडळात सर्वाधिक 5,112 घरे बांधण्याचे उद्दिष्ट ठेवण्यात आले असून, त्यासाठी 1,497.64 कोटी रुपये राखीव आहेत. नागपूर मंडळात 2,008 घरे (1,206.19 कोटी), छत्रपती संभाजीनगर मंडळात 1,483 घरे (258.32 कोटी), अमरावती मंडळात 969 घरे (59.98 कोटी), पुणे मंडळात 665 घरे (664 कोटी) आणि नाशिक मंडळात 237 घरे (151.57 कोटी) बांधण्याचे नियोजन आहे.

तसेच, मुंबई झोपडपट्टी सुधार मंडळासाठी 2,711.95 कोटी रुपयांची तरतूद करण्यात आली असून, इमारत दुरुस्ती व पुनर्रचना मंडळासाठी 661.73 कोटी रुपये राखीव ठेवण्यात आले आहेत. म्हाडाच्या या नव्या योजनांमुळे राज्यातील सर्वसामान्य नागरिकांना परवडणारी घरे उपलब्ध होण्यास मोठी मदत होणार असल्याचे म्हाडाकडून स्पष्ट करण्यात आले आहे.