मुंबईतील गँट मेडिकल कॉलेज आणि जेजे हॉस्पिटलमध्ये एक धक्कादायक घटना घडली. एमबीबीएसच्या तिसऱ्या वर्षात शिकणाऱ्या एका विद्यार्थ्याचा मृतदेह कॉलेज हॉस्टेलमध्ये आढळला. या विद्यार्थ्याने हॉस्टेलच्या खोलीत आत्महत्या केल्याचा संशय व्यक्त केला जात आहे. हॉस्टेलमध्ये अशी घटना घडल्याने मोठी खळबळ उडाली आहे.

मिळालेल्या माहितीनुसार, मुंबईच्या ग्रँट मेडिकल कॉलेज आणि जेजे हॉस्पिटलच्या हॉस्टेलमध्ये रविवारी (८ जून) रात्री उशिरा एका २२ वर्षीय विद्यार्थ्याचा मृतदेह आढळला. या विद्यार्थ्याचे नाव रोहन प्रजापती असे आहे. हॉस्टेलमध्ये एका रुममेटला रोहन मृतावस्थेत आढळला. या रुममेटने हॉस्टेलच्या वॉर्डनला याबाबत माहिती दिली. त्यानंतर वॉर्डनने पोलिसांना संपर्क केला.

पोलिसांनी रोहनला रुग्णालयात नेले, तेथे डॉक्टरांनी त्याला मृत घोषित केले. जेजे मार्ग पोलिसांनी या प्रकरणात अपघाती मृत्यूचा अहवाल दाखल केला आहे. रोहनने आत्महत्या केल्याचा पोलिसांना संशय आहे. या प्रकरणाचा सविस्तर तपास पोलीस करत आहेत. रोहनचा मृत्यू का आणि कसा झाला याचा शोध जेजे मार्ग पोलीस घेत आहेत.

'आम्ही रोहनचे सहकारी, हॉस्टेलमधील विद्यार्थी, त्याचे पालक, जवळच्या मित्रांचे जबाब नोंदवले आहेत. या प्रकरणात कोणताही गैरप्रकार झाला नसल्याचे प्राथमिक तपासात स्पष्ट होत आहे. पीडित विद्यार्थी हा एमबीबीएसच्या अभ्यासाबद्दल आणि त्याच्या आर्थिक परिस्थितीबाबत चिंतेत होता', अशी माहिती एका पोलीस अधिकाऱ्याने सांगितली आहे. रोहनचे आईवडील आणि भाऊ अंधेरीमधील चांदिवली या भागात राहतात.