दादर येथील शिवाजी पार्कजवळ एक मोठी दुर्घटना घडली. एका टॅक्सीवर अचानक झाड कोसळलं. या भीषण दुर्घटनेत टॅक्सीचालक जखमी झाला असून, त्याच्यावर सध्या खासगी रूग्णालयात उपचार सुरू आहेत. अपघात घटल्यानंतर स्थानिकांनी परिसरात धाव घेत अग्निशमन दलाला पाचारण केले. अग्निशमन दलाच्या जवानांनी घटनास्थळी धाव घेत वाहनचालकाचे प्राण वाचवण्याचा प्रयत्न केला. या दुर्घटनेत टॅक्सीचेही मोठे नुकसान झाले आहे.

सलमान खान (वय वर्ष ३५) असे जखमी टॅक्सी चालकाचे नाव आहे. हा अपघात शिवाजी पार्क जवळील एल.जी मार्गावर घडला. बुधवारी सलमान आपली टॅक्सी घेऊन त्या परिसरात होता. मात्र, अचानक झाड उन्मळून टॅक्सीवर पडले. भलंमोठं झाड टॅक्सीवर पडल्याने टॅक्सी चालकाला गंभीर दुखापत झाली. तसेच टॅक्सीचाही चक्काचूर झाला.

संबंधित घटना बुधवारी सकाळी १० च्या सुमारास घडली आहे. स्थानिकांना अपघाताची माहिती मिळताच त्यांनी घटनास्थळी धाव घेतली. तसेच सलमानला वाचवण्याचा प्रयत्न केला. नागरिकांनी अग्निशमन दलाला अपघाताची माहिती दिली. अग्निशमन दलाच्या जवानांनी तात्काळ घटनास्थळी धाव घेतली. यासह मदतकार्याला सुरूवात केली.

अग्निशमन दलाच्या जवानांनी टॅक्सीतील सलमान वाहनचालकाला बाहेर काढण्याचा प्रयत्न केला. तसेच त्याला तातडीने उपचारासाठी नजीकच्या खासगी रूग्णालयात उपचारासाठी दाखल केले. सध्या वाहनचालकावर उपचार सुरू असून, टॅक्सीचेही मोठे नुकसान झाले आहे.