मीरा भाईंदर महानगर पालिकेवर पुन्हा गुजराती महापौर होण्यावरून मराठी एकीकरण समिती आणि मनसेने आक्रमक पवित्रा घेतली आहे. यातच भाजपने पालिकेवर महापौर बसवण्यासाठी आमदार नरेंद्र मेहता यांच्या वहिनी डिंपल मेहता यांनी नामनिर्देशनपत्र दाखल केले आहे.

मराठी एकीकरण समितीकडून मराठी महापौर द्यावा, अन्यथा रस्त्यावर उतरून आंदोलन केले जाईल, असा ठाम इशारा दिला होता. मात्र भाजपाकडून महापौरपदासाठी डिंपल मेहता यांनी नामनिर्देशन अर्ज दाखल केल्याने मीरा-भाईंदर महानगरपालिकेवर पुन्हा एकदा गुजराती महापौर विराजमान होणार असल्याचे जवळपास निश्चित झाले आहे. तसेच उपमहापौरपदासाठी ध्रुवकिशोर पाटील यांचे नाव पुढे करण्यात आले आहे.

३ तारखेला नेताजी सुभाष चंद्रबोस चौक ते मीरा-भाईंदर महानगरपालिका मुख्यालयापर्यंत उग्र आंदोलन छेडण्यात येणार असल्याचा इशारा मराठी एकीकरण समितीचे अध्यक्ष गोवर्धन देशमुख यांनी दिला आहे. या आंदोलनामध्ये महाराष्ट्र नवनिर्माण सेना तसेच उद्धव बाळासाहेब ठाकरे यांच्या शिवसेनेचाही सहभाग असणार असल्याचे त्यांनी स्पष्ट केले आहे.

काही महिन्यांपूर्वीच मीरा भाईंदरमध्ये मराठी विरुद्ध अमराठी हा वाद उफाळून आला होता. एका परप्रांतीयाला मनसे सैनिकांकडून मराठी भाषेवर आक्षेपार्ह वक्तव्य केल्याप्रकरणी मोठा राडा झाला होता. त्यानंतर त्याच ठिकाणी राज ठाकरे यांनी जोरदार भाषण ही केले होते. यानंतर आता भाजपने महापालिकेवर अमराठी महापौर दिल्याने मोठा वाद चिघळण्याची शक्यता वर्तवली जात आहे.