Maratha Aarakshan Update:

मराठा आरक्षणाबाबत मोठी अपडेट हाती आली आहे. राज्यात मराठा आंदोलक मनोज जरांगे यांनी मराठा समाजाला ओबीसीतून आरक्षण देण्याची मागणी लावून धरली आहे. तर दुसरीकडे शिंदे सरकारने विशेष अधिवशेनात मराठा समाजाला १० टक्के आरक्षण घोषित केले आहे. या आरक्षणाची अंमलबजावणी २६ फेब्रुवारीपासून होणार आहे. याबाबत शासन निर्णयासह राजपत्र जारी करण्यात आले आहे. (Latest Marathi News)

काही दिवसांपूर्वी घेण्यात आलेल्या विशेषअधिवेशनात मराठा आरक्षणाचे विधेयक एकमताने मंजूर करण्यात आलं. त्यानंतर कायदा आणि न्यायपालिका विभागाचे सचिव सतीश वाघोले यांच्या सहीनंतर आरक्षणाचे विधेयकाचं कायद्यात रुपांतर झालं. SEBC या गटामध्ये मराठा आरक्षण देण्यात आलं आहे. ('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

कायदा आणि न्यायपालिका विभागाचे सचिव सतीश वाघोले यांच्या सहीनंतर आता राज्य सरकारने राजपत्र जाहीर केले आहे. यामुळे आता राज्यात २६ फेब्रवारीपासून मराठा आरक्षण लागू होणार आहे.

मुख्यमंत्री एकनाथ शिंदे काय म्हणाले?

'मला आनंद आहे. मी शपथ घेतली. मराठा समाजाला आरक्षण लागू झालं. जीआर निघाला. या आरक्षणाचा मराठा तरुणांना नोकरी आणि शिक्षणात फायदा होईल. याचं मला समाधान आहे. या निर्णयाचा फायदा मराठा समाजाने घ्यावा. छत्रपती शिवाजी महाराजांच्या साक्षीने बोललो,ते पूर्ण केलं,असं मुख्यमंत्री एकनाथ शिंदे म्हणाले.

'मला कोणत्याही समाजावर अन्याय न करता मराठा समाजाला टिकणारे आणि कायद्याच्या चौकटीत बसणारे आरक्षण दिल्याचा आनंद आहे, असेही शिंदे म्हणाले.

मराठा आरक्षणावर भाजप प्रदेशाध्यक्ष काय म्हणाले?

मराठा आरक्षणावर भाजप प्रदेशाध्यक्ष चंद्रशेखर बावनकुळे यांनी प्रतिक्रिया दिली आहे. '१० टक्के आरक्षण दिल्याबद्दल उपमुख्यमंत्री देवेंद्र फडणवीस, मुख्यमंत्री एकनाथ शिंदे, उपमुख्यमंत्री अजित पवार यांचे अभिनंदन आणि आभार. आरक्षण देताना फडणवीसांनी शब्द दिला होता की ओबीसी आरक्षणाला कुठलाही धक्का लागू देणार नाही, तो शब्द त्यांनी खरा करून दाखवला'.