नितीन पाटणकर, साम टीव्ही

Manoj Jarange vs Raosaheb Danve

मराठा समाजाच्या भेटीगाठीसाठी मनोज जरांगे पाटील यांनी पुन्हा एकदा राज्यव्यापी दौऱ्याला सुरुवात केली आहे. आज पुण्यातील खराडी परिसरात मनोज जरांगे यांची जाहीर सभा पार पडली. या सभेतून त्यांनी पुन्हा एकदा केंद्रीय मंत्री रावसाहेब दानवे यांच्यावर निशाणा साधला.

मराठ्यांनी ठरवलं तर तुमच्या अंगाला आयुष्यभर गुलाल लागणार नाही, तुम्हाला राजकारणातून घरी बसावं लागेल, मग शेतात जाऊन ऊस तोडण्याची परिस्थिती येईल, असा इशारा मनोज जरांगे पाटील यांनी जालन्याचे भाजप खासदार आणि केंद्रीय मंत्री रावसाहेब दानवे यांना दिला आहे.  ('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

पुण्यातील खराडी परिसरात मनोज जरांगे पाटील (Manoj Jarange Patil) यांची आज जंगी सभा पार पडली. या सभेतून त्यांनी हा इशारा दिला आहे. अगदी आठवडाभरापूर्वी भोकरदन तालुक्यातील बोरगाव जहागीर गावात मराठा समाजाने लावलेले बॅनर काही लोकांनी फाडले होते. यावेळी जाब विचारणाऱ्या मराठा तरुणांनाही मारहाण करण्यात आली.

सोशल मीडियावर या घटनेचे व्हिडीओ व्हायरल झाल्यानंतर अनेकांनी संताप व्यक्त केला. ही मारहाण भाजप खासदार रावसाहेब दानवे (Raosaheb Danve) यांच्या समर्थकांनी केल्याचा आरोपही अनेकांकडून करण्यात आला. यावरून मनोज जरांगे पाटील यांनी देखील दानवे यांना चांगलेच खडेबोल सुनावले आहेत.

आता पोस्टर फाडले तर आम्ही तुमचे कपडे फाडू, असा इशाराही मनोज जरांगे यांनी दिला. मराठ्यांनी ठरवलं तर आयुष्यभर तुझ्या अंगाला गुलाल लागू देणार नाही. मग ऊस तोडायलाच शेतात जावं लागेल, असं म्हणत जरांगे यांनी दानवेंवर शाब्दिक हल्लाबोल केला.

मी फक्त तुझे घर कसे आहे ? कुठे आहे हे पाहायला आलो तरी माझ्यासोबत आलेल्या लाखो लोकांच्या पायाच्या धुळीने तुझा बंगला उडून जाईल, असा टोलाही जरांगे यांनी रावसाहेब दानवे यांना लगावला.

दरम्यान, मराठा समाजाला आरक्षणाची गरज का आहे? हे सांगताना मनोज जरांगे यांनी अशी काही विधानं केली आहेत ज्यामुळं वाद निर्माण होण्याची शक्यता आहे. आरक्षण आधीच मिळालं असतं, तर ज्याची लायकी नाही त्याच्या हाताखाली काम करायची वेळ आली नसती, असं जरांगेंनी म्हटलं आहे.