Pune News :

आगामी लोकसभा निवडणुकीत महायुती आणि महाविकास आघाडी असा सामना राज्यात पाहायला मिळणार आहे. एकीकडे महाविकास आघाडीचा जागावाटपाचा फॉर्म्युला ठरला असल्याची माहिती सूत्रांकडून मिळत आहे. तर दुसरीकडे महायुतीत काही जागांवरुन रस्सीखेच सुरु असल्याचं दिसून येत आहे.  ('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

पुण्याच्या मावळमध्ये आगामी लोकसभेवरून महायुतीत वाद होण्याची शक्यता निर्माण झाली आहे. कारण महायुतीतील तीनही पक्षांना मावळ मतदारसंघावर आपला दावा सांगितला आहे.

शिवसेना शिंदे गटाचे श्रीरंग बारणे हे मावळमधून विद्यमान खासदार आहेत. त्यामुळे आगामी लोकसभा निवडणुकीसाठी देखील तेच येथून इच्छुक आहेत. तशी त्यांनी इच्छा बोलून देखील दाखवलेली आहे. (Latest Marathi News)

मात्र श्रीरंग बारणे इच्छूक असताना देखील आता उर्से टोल नाका येथे भाजपचे माजी राज्यमंत्री बाळा भेगडे यांचे भावी खासदार म्हणून फलक झळकले आहेत. तर दुसरीकडे अजित पवार गटाने देखील मावळ लोकसभेवर नुकताच दावा केला होता. त्यामुळे महायुतीतच मावळ लोकसभेवरून वाद होण्याची चिन्ह आहेत.

तिन्ही पक्षाच्या नेत्यांनी मावळ लोकसभेवर दावा ठोकला आहे. बाळा भेगडे यांच्या भावी खासदाराच्या फलकामुळे विद्यमान खासदार श्रीरंग बारणे यांचे मात्र टेन्शन वाढल आहे. तर अजित पवार गटाच्या दाव्यात या टेन्शनमध्ये भरच पडली आहे. त्यामुळे मावळ लोकसभा उमेदवारी कोणाला मिळणार हे आगामी काळच ठरवेल.