निवृत्ती बाबर, साम टीव्ही

Yavatmal - Washim Loksabha: राज्याच्या राजकीय वर्तुळातून एक मोठी बातमी समोर येत आहे. राज्यातील आगामी लोकसभा आणि विधानसभा निवडणुकींसाठी सर्वच राजकीय पक्षांनी मोर्चेबांधणी सुरू केली आहे. विशेषता मुख्यमंत्री एकनाथ शिंदे यांच्यासोबत गेलेल्या आमदार आणि खासदारांना घेरण्यासाठी ठाकरे गटाकडून रणनिती आखली जात आहे. (Latest Marathi News)

अशातच यवतमाळ-वाशिम लोकसभा मतदारसंघातील विद्यमान खासदार भावना गवळी यांना शह देण्यासाठी ठाकरे गटाने जोरदार फिल्डिंग लावल्याची माहिती आहे. यासाठी माजी मंत्री संजय देशमुख यांनी तयारी सुरू केली असून येत्या ११ तारखेला त्यांच्या नेतृत्वाखाली यवतमाळमध्ये कार्यकर्ता हुंकार मेळाव्याचे आयोजन करण्यात आलं आहे. (Maharashtra Political News)

दिग्रस मतदार संघातून संजय देशमुख आमदार होते, त्यांनी 2002 ते 2004 या काळात मंत्रीपद भूषवलं होतं. काँग्रेसमध्ये असताना संजय देशमुख यांनी आता शिंदे गटात असणाऱ्या संजय राठोड यांचा पराभव केला होता. एकनाथ शिंदे यांनी बंड केल्यानंतर त्यांनी शिवसेनेत प्रवेश केला.

सुरुवातीला ते संजय राठोड (Sanjay Rathod) यांच्याविरोधात ते निवडणूक लढतील, असा अंदाज बांधला जात होता. मात्र त्यांनी दिग्रसच्या बाहेर पडून बैठका घ्यायला सुरुवात केली आहे. आता भावना गवळी यांना पराभूत करण्यासाठी त्यांनी ठाकरेंना पाठिंबा दिला आहे.

संजय देशमुख यांच्यासह पोहरा देवी गडाचे महंत सुनील महाराज हे देखील भावना गवळी यांच्याविरोधात निवडणूक लढण्यास इच्छुक आहेत. स्वतः सुनील महाराजांनी इच्छा व्यक्त केली आहे.

भावना गवळी यांच्या विरोधात लढण्यासाठी उद्धव साहेबांनी (Uddhav Thackeray) आदेश दिला, तर मी नक्की लढेन, असं महंत सुनील महाराज यांनी म्हटलं आहे. दरम्यान, या अनुषंगाने आज वाशिममध्ये पदाधिकाऱ्यांच्या बैठकीचे आयोजन करण्यात आले होते. या बैठकीत त्यांनी शिवसैनिकांना मेळाव्यालाही उपस्थित राहण्याचे आवाहन केले.

Edited by - Satish Daud