संघर्ष गांगुर्डे, कल्याण

डोंबिवली पालिका निवडणुकांचा माहोल चांगलाच तापला असताना ठाकरे गटाला मोठा झटका बसला आहे. कल्याण-डोंबिवली महानगरपालिकेचे माजी महापौर व शिवसेना ठाकरे गटाचे ज्येष्ठ नेते रमेश जाधव यांनी आज अधिकृतपणे मुख्यमंत्री एकनाथ शिंदे यांच्या नेतृत्वाखालील शिवसेना शिंदे गटात प्रवेश केला.

स्थानिक स्वराज्य संस्थांच्या निवडणूका काही दिवसांवर येऊन ठेपल्या आहेत. या पार्श्वभूमीवर सर्वत्र दमदार तयारी सुरु आहे. अशातच मुंबईतील आयोजित कार्यक्रमात उपमुख्यमंत्री एकनाथ शिंदे, खासदार डॉ. श्रीकांत शिंदे, शहरप्रमुख निलेश शिंदे आणि संपर्कप्रमुख महेश गायकवाड यांच्या उपस्थितीत रमेश जाधव यांनी धनुष्यबाण हाती घेतलं आहे.

यावेळी वरिष्ठ नेत्यांनी जाधव यांचे स्वागत करत आगामी KDMC निवडणुकीत शिंदे गट अधिक बळकट होणार असल्याचा विश्वास व्यक्त केला. रमेश जाधव यांच्या प्रवेशामुळे कल्याण–डोंबिवलीतील राजकीय गणितात बदल होण्याची शक्यता व्यक्त केली जात आहे. महापौर म्हणून कार्यरत असताना जाधव यांनी परिसरात मजबूत पक्षसंघटना उभी केली होती.

त्याच प्रमाणे शहरा मोठ्या प्रमाणात विकास कामे केली होती त्यामुळे त्यांच्या या निर्णयाचा ठाकरे गटावर परिणाम होणार हे निश्चित मानले जात आहे. निवडणुकांच्या अगोदर होणाऱ्या या राजकीय हालचालींमुळे कल्याण–डोंबिवलीत राजकीय वातावरण आणखी तापण्याची चिन्हे दिसत आहेत.