महाराष्ट्राच्या प्रशासनात पुन्हा एकदा बदल करण्यात आले आहेत. राज्य सरकारने बुधवारी जारी केलेल्या अधिसूचनेद्वारे ८ वरिष्ठ आयएएस अधिकाऱ्यांच्या बदल्या जाहीर केल्या आहेत. या बदल्यांमुळे अनेक महत्त्वाच्या विभागांना नवीन अधिकारी मिळणार असून विविध विकास योजनांच्या अंमलबजावणीला गती मिळण्याची अपेक्षा व्यक्त केली जात आहे.

राज्य सरकारने बुधवारी महाराष्ट्र प्रशासनात महत्त्वाचे बदल केले. ८ IAS अधिकाऱ्यांच्या बदल्या मुंबईसह अनेक जिल्ह्यांमध्ये करण्यात आल्या आहेत. या फेरबदलांमध्ये पुण्यातील महाराष्ट्र राज्य कृषी महामंडळाचे व्यवस्थापकीय संचालक रुपेश जयवंशी यांची मुंबईस्थित महात्मा फुले मागासवर्गीय विकास महामंडळाच्या व्यवस्थापकीय संचालकपदी नियुक्ती करण्यात आली आहे. सामाजिक आणि आर्थिकदृष्ट्या मागास घटकांच्या विकासासाठी राबविण्यात येणाऱ्या योजनांच्या अंमलबजावणीत त्यांची महत्त्वपूर्ण भूमिका राहणार आहे.

तसेच, श्रीधर दुबे यांची नवी मुंबई येथे राष्ट्रीय ग्रामीण उपजीविका अभियानाच्या मुख्य कार्यकारी अधिकारीपदी नियुक्ती करण्यात आली आहे. ग्रामीण भागातील स्वयंरोजगार, महिला बचत गटांचे सक्षमीकरण आणि विविध विकास योजनांची प्रभावी अंमलबजावणी यावर त्यांचा विशेष भर राहण्याची शक्यता आहे. महाराष्ट्र राज्य बाल हक्क संरक्षण आयोगाचे सचिव पंकज देवरे यांचीही बदली करण्यात आली असून त्यांची महानगर प्रदेश विकास प्राधिकरणात (एमएमआरडीए) सह महानगर आयुक्त म्हणून नियुक्ती झाली आहे. मुंबई महानगर क्षेत्रातील पायाभूत सुविधा आणि विकास प्रकल्पांमध्ये त्यांच्यावर महत्त्वाच्या जबाबदाऱ्या सोपविण्यात येणार आहेत.

याशिवाय, जगदीश मिनियार यांची छत्रपती संभाजीनगर येथील सिडकोच्या मुख्य प्रशासकपदी नियुक्ती करण्यात आली आहे. वर्षा लड्डा यांच्याकडे महिला व बालविकास विभागाच्या आयुक्तपदाची धुरा सोपविण्यात आली असून महिला व बालकल्याणाशी संबंधित योजनांच्या अंमलबजावणीवर त्यांचे लक्ष राहणार आहे. डॉ. मंजिरी मनोलकर यांची महाराष्ट्र राज्य शेती महामंडळाच्या व्यवस्थापकीय संचालकपदी नियुक्ती करण्यात आली आहे. तर निलेश सागर यांची पुण्यातील आदिवासी संशोधन व प्रशिक्षण संस्थेच्या आयुक्तपदी नियुक्ती झाली आहे.राज्य सरकारच्या या निर्णयामुळे विविध विभागांतील प्रशासन अधिक सक्षम होईल अशी अपेक्षा व्यक्त केली जात आहे. प्रशासन विभागाने या बदल्यांची अंमलबजावणी लवकरात लवकर करण्याचे निर्देश दिले आहेत.