बदलापूर शहरात रासायनिक प्रदूषण करणाऱ्या कंपन्यांना राज्य सरकारनं दणका दिला आहे. आतापर्यंत २४ प्रदूषणकारी कंपन्यांवर कारवाई करण्यात आल्याची माहिती पर्यावरण मंत्री पंकजा मुंडे यांनी विधान परिषदेत दिली होती. या कंपन्यांवर कारवाईची मागणी करणारा तारांकित प्रश्न आमदार ज्ञानेश्वर म्हात्रे यांनी विचारला होता. यावर उत्तर देताना पंकजा मुंडेंनी एकूण २४ कंपन्यांवर कारवाई करण्याचे आदेश दिले असल्याचं सांगितलं.

बदलापूरच्या खरवई परिसरात रासायनिक एमआयडीसीच्या अनेक कंपन्या आहेत. या एमआयडीसीतील कंपन्या अनेकदा रासायनिक वायू हवेत उत्सर्जित करत असतात. हा रासायनिक वायू वातावरणात पसरतात. ज्यामुळे बदलापुरकरांना नेहमीचा त्रास सहन करावा लागतो. या कंपन्यांवर कारवाई करण्याचा तारांकित प्रश्न आमदार ज्ञानेश्वर म्हात्रे यांनी उपस्थित केला होता.

म्हात्रे यांनी प्रश्न उपस्थित केल्यानंतर पर्यावरण मंत्री पंकजा मुंडे यांनी उत्तर दिलं आहे. बदलापूर एमआयडीसीतील एकूण २४ कंपन्यांवर कारवाई करण्यात आल्याची माहिती पंकजा मुंडे यांनी दिले आहे. यापैकी ५ कंपन्यांवर उत्पादन बंद करण्याची कारवाई करण्यात आली असून, ५ कंपन्यांना अंतरिम आदेश, ५ कंपन्याना प्रस्तावित आदेश आणि ९ कंपन्यांना कारणे दाखवा नोटीस बजावण्यात आल्याचं त्यांनी सांगितलं आहे.

याशिवाय रिलायबल गॅल्वनायझर अँड फास्टनर कंपनी हवेत ऍसिडिक वायू उत्सर्जित करते. ज्याचा त्रास बदलापुरकरांना होतो. हाच त्रास लक्षात घेता या कंपनीला नियमांची पूर्तता करण्याचे आदेश देण्यात आले होते. मात्र ते न केल्याने उत्पादन बंद करण्याचे आदेश या कंपनीला देण्यात आल्याची माहिती सुद्धा पंकजा मुंडे यांनी दिलीय.