सध्या जगात सुरु असलेल्या इस्त्राईल आणि इराणच्या युद्धाचा फटका भारतीयांच्या स्वयंपाक घराला बसला आहे. या युद्धामुळे ऊर्जा आयातीवर मोठा परिणाम होऊन घरगुती गॅसची किंमत अव्वाच्या सव्वा वाढून त्याचा तुटवडा जाणवू लागला आहे. अशातच आता कंपन्यांनी गॅस सिलिंडरच्या बुकिंगशी संबंधित नियमात मोठा बदल केला आहे. आता बुकिंगची वेळ १५ दिवसांनी वाढवून २१ दिवसांपर्यंत करण्यात आली आहे. म्हणजेच आता एक सिलिंडर मिळाल्यानंतर दुसरा सिलिंडर डिलिव्हरीदरम्यान २१ दिवसांचं अंतर असेल.

हा नवीन नियम लागू करण्यासाठी एजन्सींचे सॉफ्टवेअर तातडीने अपडेट करण्यात आले आहे, पण बुकिंग प्रक्रिया पहिल्यासारखीच राहणार असल्याचे सांगण्यात आले आहे. ग्राहक पहिल्या सिलिंडरच्या खरेदीनंतर पुढील सिलिंडर लगेच बुक करू शकतात, मात्र युद्धाची पार्श्वभूमी लक्षात घेता भविष्यात सिलिंडरचा तुटवडा भासू नये म्हणून, २१ दिवसांनंतरच बुकिंग करण्याची परवानगी देण्याचा विचार केला जात आहे. जर हा नवीन नियम लागू झाला, तर आधीच्या सिलिंडरचा २१ दिवसांचा कालावधी संपल्यानंतरच तुम्हाला पुढील सिलिंडर बुक करता येणार आहे.

इस्त्राईल आणि इराण युद्ध भडकलं!

अमेरिकेचे राष्ट्राध्यक्ष डोनाल्ड ट्रम्प यांच्या इशाऱ्यानंतर शनिवारी काही तासांत इस्रायलने इराणवर हल्ले सुरू केले. या हल्ल्यात इराणच्या तेल शुद्धीकरण प्रकल्पाला भीषण आग लागली. ही आग इतकी भडकली की सर्वत्र धुराचे लोट पसरले होते. याचा व्हिडिओदेखील समोर आला आहे. दरम्यान हे युद्ध आणखी किती दिवस असचं सुरु राहणार हे पाहणं महत्त्वाचं ठरेल.