पुणे जिल्ह्यातील काही ठिकाणी निवडणुका रद्द करण्यात आल्या आहेत. जिल्ह्यातील अनेक ठिकाणांच्या नगरपरिषद आणि नगरपंचायीच्या निवडणुकाचा समावेश आहे. यामध्ये बारामती आणि फुरसुंगीमधील काही प्रभागांचा समावेश आहे. तर तळेगाव दाभाडे, लोणावळा, दौंड आणि सासवडमधील काही ठिकाणच्या निडवणुका रद्द करण्यात आल्या आहेत. जाणून घ्या कुठे कुठे निवडणुका रद्द झाल्यात.

राज्य निवडणूक आयोगाने नगरपरिषदा आणि नगरपंचायतीमध्ये ज्या जागेसाठी अपील दाखल होते. परंतु अपीलाचा निकाल संबंधित जिल्हा न्यायालयाकडून २२ नोव्हेंबर नंतर म्हणजेच २३ नोव्हेंबर किंवा त्यानंतर देण्यात आलेला आहे, अशा नगरपरिषदा आणि नगरपंचायतीच्या सदस्य पदाच्या त्या जागेच्या निवडणूका ४ नोव्हेंबर रोजीच्या कार्यक्रमानुसार घेण्यात येवू नयेत. या प्रकरणात अध्यक्षपदाचा समावेश असल्यास त्या संपूर्ण नगरपरिषदेची निवडणूक स्थगित करण्यात आली आहे. त्यानंतर त्या ठिकाणच्या निवडणूकांसाठी सदर आदेशासोबत सुधारीत वेळापत्रकानुसार निवडणूकीचा कार्यक्रम राबवावा, असे कळविले आहे.

पुणे जिल्हयातील बारामती आणि फुरसुंगी उरुळी देवाची नगरपरिषदेच्या सार्वत्रिक निवडणूकीच्या अनुषंगाने अध्यक्ष पदासंदर्भात जिल्हा न्यायालयात अपील दाखल झाले होते. आयोगाच्या निर्देशानुसार सदर अपीलावर २२ नोव्हेंबर रोजीपर्यंत न्यायालयाचा निकाल पारीत होणे आवश्यक होते. तथापि, उक्त नमुद नगरपरिषदांच्या अध्यक्षपदाच्या अपीलावर न्यायालयाने २६ नोव्हेंबर रोजी निकाल पारीत केलेला आहे.

बारामती नगरपरिषदेच्या जागा क्र. २ (अ), ८ (ब), ११ (ब), १३ (ब), १५ (ब), १७(अ)) व १९ (ब) साठीचे न्यायालयाचे निकाल देखील २२ नोव्हेंबर रोजी नंतर लागलेले आहेत. फुरसुंगी उरुळी देवाची नगरपरिषदेच्या जागा क्र. १३ (ब) करिता निकाल २२.११.२०२५ रोजी नंतरच पारित करण्यात आला आहे. तरी आयोगाच्या दि.२९ नोव्हेंबर रोजीच्या आदेशात नमूद केल्यानुसार सदर दोन्ही नगरपरिषदांच्या अध्यक्ष पदाचा समावेश असल्याने त्या बारामती आणि फुरसुंगी उरुळी देवाची या दोन्ही संपूर्ण नगरपरिषदेची निवडणूक स्थगित करण्यात आल्या आहेत. बारामती आणि फुरसुंगी उरुळी देवाची नगरपरिषदेच्या अध्यक्षपदासाठी आणि सदस्यपदांसाठीची सार्वत्रिक निवडणूक, २०२५ चे मतदान २० डिसेंबर रोजी घेण्यात येणार आहे.

तसेच तळेगाव दाभाडे, लोणावळा, दौंड आणि सासवड नगरपरिषदेच्या सार्वत्रिक निवडणुकीच्या अनुषंगाने सदस्य पदासंदर्भात देखील जिल्हा न्यायालयात अपील दाखल झाले होते. सदर अपीलावर देखील न्यायालयाने दि.२२.११.२०२५ नंतर निकाल पारित केलेला असल्यामुळे तळेगाव दाभाडे नगरपरिषदेच्या जागा क्र. २ (अ), ७ (अ), ७ (ब), ८ (अ), ८ (ब) व १० (ब), लोणावळा नगरपरिषदेच्या जागा क्र.५ (ब) व १० (अ) व दौंड नगरपरिषदेच्या जागा क्र.९ (अ) व सासवड नगरपरिषदेच्या जागा क्र. ११ (अ) या सदस्य पदाच्या सार्वत्रिक निवडणूकीसाठी देखील आता दिनांक २० डिसेंबर रोजी मतदान घेण्यात येणार आहे.

नगरपरिषदांसाठी अध्यक्ष आणि सदस्य पदासाठी नव्याने कोणत्याही उमेदवारास नामनिर्देशन दाखल करता येणार नाही. फक्त ज्या उमेदवारांना नामनिर्देशनपत्र मागे घ्यावयाचे असल्यास, नामनिर्देशनपत्र मागे घेण्याचा अंतिम दिनांक १० डिसेंबर रोजी दुपारी ०३.०० वाजेपर्यत आहे.

बारामती व फुरसुंगी उरुळी देवाची नगरपरिषदेच्या अध्यक्षपदासहित सर्व सदस्यपदाच्या सार्वत्रिक निवडणुकांसाठी तसेच, तळेगाव दाभाडे, लोणावळा व दौंड नगरपरिषदेच्या उक्त नमुद जागेच्या सदस्यपदाच्या निवडणूकांसाठी मा. राज्य निवडणूक आयोगाने निर्गमित केलेल्या सुधारीत वेळापत्रकानुसार निवडणूक कार्यक्रम स्वंतत्रपणे वृत्तपत्रात प्रसिद्ध करण्यात येईल. तसेच, त्यास संबंधित क्षेत्रात यथोचित प्रसिध्दी देण्यात येईल याची सर्व नागरीकांनी नोंद घ्यावी असे आवाहन पुणे जिल्हाधिकारी जितेंद्र डूडी यांनी केले आहे.