राज्यभरातील विविध भागात बिबट्यांचा मानवी वस्तीत वावर वाढला आहे. जनावारांचं रक्त पिण्याची सवय लागलेल्या बिबट्यांचा मानवी वस्तीत घुसून कोंबड्या, शेळ्यांचा फडशा पाडण्याचा एककलमी कार्यक्रम सुरु आहे. बिबट्यांकडून लोकांवरही हल्ला केल्याचा घटना घडल्या आहेत. याच बिबट्याची दहशत पुण्यातील टाकेवाडीतही पाहायला मिळत आहे. प्राण्यांसहित लोकांवर जीवघेणा हल्ला करणारा बिबट्या कोंबडीवर झडप घालताना सीसीटीव्ही कॅमेऱ्यात आढळला आहे. बिबट्या सीसीटीव्हीत आढळल्यानंतर गावकऱ्यांमध्ये दहशत पसरली आहे.

पुण्यातील आंबेगाव तालुक्याच्या थोरांदळे गावात काही दिवसांपूर्वी बिबट्याने ज्येष्ठ व्यक्तीवर हल्ला केला होता. हल्ला करणाऱ्या या बिबट्याला जेरबंद करण्यास यश आलं आहे. त्यानंतर आता आंबेगाव तालुक्यातील टाकेवाडीत बिबट्या आढळला आहे. बिबट्याच्या शिकारीमुळे लोकांमध्ये दहशत पसरली आहे. या बिबट्याने प्राणी-पक्ष्यांवर हल्ले चढवणे सुरु केले आहेत. रात्रीच्या अंधारात शिकारीसाठी शिरलेल्या बिबट्याने पाळीव जनावरांवर नाही तर कोंबड्यांवर हल्ला केला. यामुळे बिबट्या कोंबडी चोर बनलाय का, अशी चर्चा लोकांमध्ये सुरु झाली आहे.

आंबेगाव तालुक्यातील टाकेवाडीत बिबट्याने आठवडाभरात दुसऱ्यांदा कोंबडी पळवून नेल्याची घटना सीसीटीव्हीत कैद झाली आहे. या 'कोंबडी चोर बिबट्या'मुळे शेतकरी भयभीत झाले आहेत. त्यामुळे लोकांनी बिबट्याला तातडीने जेरबंद करण्याची मागणी केली.

नेमकं काय घडलं?

कोंबडी चोर बिबट्याची पुन्हा एकदा टाकेवाडीत जनावरांच्या गोठ्यात दाखल झाला. या बिबट्याने बंदिस्त असलेल्या या गोठ्यातून कोंबडी पळवून नेली. बिबट्याचा हा शिकारीचा थरार सीसीटीव्हीत कैद झालाय. या हल्लामुळे पाळीव जनावरांवर बिबट्याच्या हल्ल्याची चांगलीच दहशत निर्माण झाली आहे. या बिबट्याला जेरबंद करण्याची मागणी जोर धरू लागली आहे.

थोरांदळेतील बिबट्या जेरबंद

आंबेगाव तालुक्यातील थोरांदळे परिसरात एका ज्येष्ठ व्यक्तीवर हल्ला करून दहशत निर्माण केलेल्या बिबट्याला जेरबंद करण्यात वन विभागाला यश आलं. थोरांदळे ग्रामस्थांच्या मागणीवरून वन विभागाने येथे लावलेल्या पिंजऱ्यात पाच ते सहा वर्षाचा नर जातीचा बिबट्या जेरबंद झाला. पिंजऱ्यात अडकलेल्या बिबट्याला वन विभागाने ताब्यात घेत माणिकडोह बिबट निवारा केंद्राकडे सुपुर्द केले आहे.