कोल्हापूर : शिवजयंतीचे औचित्य साधत कोल्हापुरातील शिवभक्त सुजित प्रभावळे यांनी त्यांच्या १ वर्षीय वीरांशी हिच्या पहिल्या वाढदिवसानिमित्त छत्रपती संभाजीराजे यांच्या जीवनावर आधारित असणाऱ्या 'छावा' या चित्रपटासाठी संपूर्ण थिएटर बुक केलं. आज शिवजयंती आणि वीरांशी हिचा वाढदिवस देखील आहे. यामुळे सुजित प्रभावळे यांनी कोल्हापुरातील बाल संकुलमधील गरीब आणि अनाथ मुलांसाठी 'छावा' या चित्रपटाचा शो आयोजित केला होता. कोल्हापुरातील आईनॉक्स थिएटरमध्ये या विशेष शोचे आयोजन करण्यात आलं होतं.

'छावा' हा चित्रपट सध्या प्रेक्षकांच्या हृदयात ठसा उमटवत आहे. दमदार कथा, उत्कृष्ट अभिनय आणि प्रभावी संवाद यामुळे हा चित्रपट चर्चेत आहे. छत्रपती संभाजी महाराजांचा पराक्रमी इतिहास भव्य स्वरूपात उलगडणारा हा चित्रपट केवळ युद्धाची शौर्यगाथा सांगत नाही, तर त्यांची बुद्धिमत्ता, राज्यकारभारातील कौशल्य आणि स्वराज्यासाठी त्यांनी दिलेले बलिदानही अधोरेखित करतो.

तब्बल १३० कोटींच्या बजेटमध्ये तयार झालेल्या या चित्रपटाने आठवड्याच्या आतच १६५ कोटींपेक्षा जास्त कमाई केली आहे. थिएटरमध्ये 'छावा' पाहताना प्रेक्षकांचा जल्लोष, जयघोष आणि अंगावर काटा आणणारे क्षण हेच या चित्रपटाच्या यशाचा खरा पुरावा आहेत. मात्र, या चित्रपटातील सर्वात खास गोष्ट म्हणजे त्याचे संवाद लिहिणाऱ्या इरशाद कामिल यांनी यासाठी एकही रुपया घेतलेला नाही.