गोपाळ मोटघरे

Pune News:

हॉटेल व्यवसाय सुरू करण्यासाठी तीन आरोपींनी एका भंगार व्यवसायिकाच्या मुलाचं अपहरण केलं आहे. पिंपरी चिंचवड शहरात ही धक्कादायक घटना घडली आहे. आरोपींनी १४ वर्षांच्या मुलाचे अपहरण करत ३० लाख रुपयांची खंडणी मागितली. पोलिसांनी या प्रकरणी आरोपींना ताब्यात घेतलं आहे. (Latest Crime News)

घटनेबाबत अधिक माहिती अशी की, पिंपरी चिंचवड पोलिसांच्या गुन्हे शाखा चार पोलीस पथकाने अपहरण करणाऱ्या तीनही आरोपींना अपहरण झाल्याच्या घटनेपासून फक्त चार तासाच्या आतच बेड्या ठोकल्या आहेत. तेजस, अर्जुन आणि विकास या तिघांनी मिळून आज सकाळी ताथवडे परिसरात राहणाऱ्या एका भंगार व्यवसायिकाच्या चौदा वर्षाचे मुलाचे मारुती झेन कारमध्ये अपहरण केलं होतं.

अपहरण केल्यानंतर आरोपींनी मुलाच्या काकाला वेगवेगळ्या मोबाईल नंबर वरून फोन करून तीस लाख रुपयांच्या खंडणीची मागणी केली होती. मात्र पिंपरी चिंचवड शहर पोलिसांच्या गुन्हे शाखा चार पोलीस पथकाने तांत्रिक तपास करून अपहरण करणाऱ्या आरोपीचे लोकेशन ट्रेस केले.

त्यानंतर अवघ्या चार तासाच्या आत अपहरण करणाऱ्या तिन्ही आरोपींना पोलीसांनी बेड्या ठोकल्या आहेत. या तिन्ही आरोपीकडून तीन मोबाईल फोन, एक पिस्टल, एक अडीच फूट लांबीचा कोयता, एक सुरा, छत्री, हातोडा आणि मास्क असा मुद्देमाल पोलिसांनी जप्त केला आहे. तसेच मुलाची सुखरुप सुटका करण्यात आली आहे.